Il-kompetizzjonijiet Ewropej jirritorna proprju din il-ġimgħa hekk kif mil-lum jibda jintlagħab l-ewwel leg tal-Aħħar 16 tal-UEFA Champions League bi programm ta’ żewġ partiti li jkunu segwiti b’żewġ logħbiet għada u erba’ oħra l-ġimgħa d-dieħla.
ILLUM
FC Copenhagen v Man City (9.00 pm)
Il-holders, Manchester City, imorru fil-belt kapitali Daniża, Copenhagen, biex ikomplu d-difiża tat-titlu, f’din il-fażi eliminatorja.
It-team immexxi mill-manager, Pep Guardiola, jinsab miexi fid-direzzjoni l-ġusta hekk kif fil-Premier League Ingliż jinsab fit-tieni post, żewġ punti wara l-leaders Liverpool u jrid jirkupra partita wkoll.
Fil-fażi tal-gruppi ta’ din il-kompetizzjoni huma temmew b’punti massimi, fi Grupp G, li kien jinkludi wkoll lil RB Leipzig, Red Star Belgrade u Young Boys.
Min-naħa tagħhom, FC Copenhagen spiċċaw fit-tieni post ta’ Grupp A, wara Bayern Munich iżda quddiem Galatasaray u Manchester United rispettivament.
Bla dubju, is-City jibdew favoriti li llum joħorġu b’rebħa iżda jridu juru rispett lejn l-avversarji tagħhom minħabba li jippossjiedu ndividwalisti tajbin.
Iżda t-tandem bejn Kevin De Bruyne u Erling Haaland għandu jkun it-theddida ewlenija għad-Daniżi. U jekk dawn iż-żewġ players kienu nieqsa mill-azzjoni għal bosta ġimgħa, issa huwa ż-żmien f’waqtu u opportun li jgħinu lit-team jissielet fuq kull front … meta għandhom ċans li jirrepetu l-istess suċċess tas-sena li għaddiet … it-Treble!
Jidher li Guardiola għandu l-iskwadra kollha għad-dispożizzjoni tiegħu. Min-naħa tad-Daniżi, dawn se jkollhom jgħaddu mingħajr l-imweġġgħin, Nicolas Boilesen, Theo Sander, David Khocolava u Birger Meling.
RB Leipzig v Real Madrid (9.00 pm)
Dan il-konfront għandu jknu wieħed delikat għal Real Madrid meta jivvaġġjaw lejn il-Ġermanja biex jaffrontaw lil RB Leipzig.
Il-Madrileni, li rebħu din il-kompetizzjoni għal 14-il darba, iddominaw Grupp C, tant, li bħal Manchester City rebħuh b’punti massimi.
Min-naħa ta’ Leipzig spiċċaw fit-tieni post ta’ Grupp C, sitt punti inqas minn Manchester City fejn tilfu ż-żewġ konfronti diretti kontra t-team Ingliż.
Wara l-waqfa tax-xitwa, Liepzig ma tantx kellhom ritorn feliċi minħabba li sofrew tliet telfiet konsekuttivi, segwiti minn rebħa fuq Union Berlin u fi tmiem il-ġimgħa li għadda spiċċaw fi draw ta’ 2-2 kontra Augsburg.
Il-coach, Marco Rose, se jkollu l-iskwadra kollha għad-dispożizzjoni fejn se jirritorna wkoll Amadou Haidara li kien nieqes kontra Augsburg.
Il-coach ta’ Real, Carlo Ancelotti, qed jittama li Jude Bellingham jilħaq jirkupra wara li fir-rebħa ta’ 4-0 fuq Girona, fi tmiem il-ġimgħa, kellu jħalli l-ground minħabba li ħass uġiegħ fl-għaksa.
Jekk Bellingham ma jkunx fil-formazzjoni inizjali, postu mistenni jimtela minn Brahim Diaz.
Antonio Rudiger għadu qed jirkupra minn injury fil-koxxa u għaldaqstant Nacho Fernandez mistenni jilgħab fil-qalba tad-difiża.
Barra minn hekk, Eder Militao, David Alaba u Thibaut Courtois, qed jirkupraw injury fit-tul u għaldaqstant ma għamlux il-vjaġġ.
