Afgani għatxana għal ħajja aħjar barra l-Afganistan spiċċaw vittmi ta’ attakk teroristiku f’Kabul. Skont uffiċjal tas-saħħa fil-pajjiż jidher li f’dawn iż-żewġ splużjonijiet tilfu ħajjithom aktar minn 60 persuna u ndarbu mill-anqas 140 persuna oħra. L-isplużjonijiet seħħew fiż-żona ta’ Abbey Gate, fejn uffiċjali Amerikani u Ingliżi jinsabu stazzjonati biex jgħinu fil-proċess tal-evakwazzjoni.
Kemm it-Talibani kif ukoll il-President Amerikan Joe Biden ikkonfermaw l-aħbar li seħħ dan l-attakk. Intant aktar kmieni llum stess xi pajjiżi fosthom ir-Renju Unit u l-Awstralja ħarġu twissija dwar possibilità ta’ attakk terroristiku fl-ajruport ta’ Kabul u appellaw biex barranin jevitaw l-inħawi tal-ajruport.
L-attakk seħħ ftit sigħat wara li numru ta’ pajjiżi ħabbru li kienu se jwaqqfu l-evakwazzjoni minħabba raġunijiet ta’ sigurtà li fl-aħħar sigħat komplew ipoġġu riskju għal dawk involuti. Fost mexxejja ta’ pajjiżi li ħabbru li se jwaqqfu l-evakwazzjonijiet wara l-isplużjonijiet hemm in-Norveġja. Il-Ministru għall-Affarijiet Barranin fil-pajjiż Ine Eriksen Soereide qalet li l-ajruport huwa magħluq u għalhekk m’għadux possibbli li jitħallew jidħlu persuni.
#Afganistan, today. At least 40 dead and 120 wounded, many in critical condition following #Kabulairport twin bomb blasts.#Taliban pic.twitter.com/yWA3PLQET8
— Shooter (@Nfe5o1Z) August 26, 2021
