Il-football donnu ma jieqaf qatt! U hekk hu għax meta l-bieraħ intlagħbet l-aħħar ġurnata mir-raba’ matchday tal-UEFA Nations League, aktar kmieni fil-ġurnata ġew imtellgħin il-poloz tal-UEFA Europa League u tal-UEFA Europa Conference League, bil-logħob jibda fis-6 ta’ Lulju, jiġifieri, ftit iktar minn tliet ġimgħat oħra.
Fl-ewwel round ta’ kwalifikazzjoni tal- UEFA Champions League, iċ-champions Maltin, Hibernians, messithom polza kontra Shamrock Rovers tal-Irlanda li għalihom se jkunu r-raba’ avversarji minn dan il-pajjiż.
L-ewwel ma ltaqgħu kien kontra Dundalk fit-Tazza tal-Ewropa 1979-80 fejn wara rebħa 1-0 fil-Gzira Stadium, tilfu 2-0 fl-Irlanda biex ġew eliminati b’aggregate ta’ 2-1.
Imbagħad fl-istaġun ta’ wara, 1980-81, huma ltaqgħu kontra Waterford fit-Tazza tat-Tazzi u wara rebħa ta’ 1-0 f’Malta, tilfu 4-0 barra minn darhom biex ġew eliminati b’aggregate ta’ 4-1.
It-tielet team Irlandiż li lagħab kontra l-Pawlisti kien dak ta’ Shelbourne, iżda din id-darba kisbu l-kwalifikazzjoni għat-tieni round meta għelbuhom b’aggregate ta’ 3-2 fl-istaġun 2002-03, fejn wara draw 2-2 f’Malta huma rebħu 1-0 fl-Gżira tal-Emeraldi.
Imbagħad fit-tieni round l-avversarji tagħhom kienu iktar b’saħħithom meta ffaċċjaw lil Boavista tal-Portugall. Fl-ewwel leg il-logħba ntemmet 3-3 u f’dik barra minn darhom tilfu 4-0 għal aggregate ta’ 7-3.
CONFERENCE LEAGUE
It-tliet timijiet li se jieħdu sehem fl-Europa Conference League, Floriana, Hamrun Spartans u Gzira United, messithom polza mħallta fejn l-aħjar ċansijiet li jgħaddu jinsabu għand il-Maroons.
Dan meta t-team ta’ Darren Abdilla, li se jiltaqa’ kontra Atletic Club d’Escaldes ta’ Andorra, meta l-livell tal-football tagħhom huwa iktar viċin tagħna.
Atletic rebħu l-kampjonat darbtejn u t-tazza darba waqt li din se tkun l-ewwel darba li se jikkompetu fl-Ewropa.
Floriana se jiltaqgħu kontra Petrocub-Hincesti tal-Moldova, li għalihom se tkun il-ħames darba wara l-oħra li jinsabu fl-Ewropa fejn kien fl-istaġun li għadda li huma ssuperaw l-ewwel round ta’ din il-kompetizzjoni.
It-tielet team Malti fil-Conference League huma Hamrun Spartans li l-avversarji tagħhom se jkunu Alashkert tal-Armenja, li rebħu l-kampjonat erba’ darbiet u t-tazza darba.
Kien riċenti fl-istaġun 2018-19 li huma waslu sat-tielet round ta’ kwalifikazzjoni iżda sfaw megħluba minn CFR Cluj tar-Rumanija.
IL-POLOZ TAL-MALTIN
EUROPA LEAGUE
Shamrock R. (Irlanda) v Hibernians
(jilagħbu fil-5/6 u 12/13 ta’ Lulju)
CONFERENCE LEAGUE
Alashkert (Armenja) v Hamrun S.
Gzira U. v AC d’Escaldes (Andorra)
Floriana v Petrocub-Hinceti (Moldova)
(jilagħbu fis-7 u l-14 ta’ Lulju)
