Minn tal-inqas tliet persuni tilfu ħajjithom filwaqt li 50 oħra sofrew ġrieħi meta ferrovija ħarġet mill-binarji. Dan l-inċident seħħ fl-istat ta’ Montana ġewwa l-Istati Uniti tal-Amerika.
Il-kumpanija Amtrak, li topera l-ferroviji, qalet li fil-ħin li seħħ l-inċident kien hemm 141 passiġġier abbord u 16-il membru tal-ekwipaġġ. Il-ferrovija kienet fuq vjaġġ bejn Chicago u Seattle. Ritratti u filmati mxandra fuq midja internazzjonali kienu juru għadd ta’ karrijiet maqlubin u għexieren ta’ bagalji tal-passiġġieri mxerrdin ma’ kullimkien.
Għadd ta’ ħaddiema tas-salvataġġ irrispondew mill-ewwel u dawn kienu strumentali biex ġew salvati numru ta’ passiġġieri. Dwar dan, il-US National Transportation Safety Board nieda investigazzjoni biex ikun magħruf x’wassal għal dan l-inċident.
