Andre Calleja ta’ 31 sena residenti Bormla baqa’ jinżamm arrestat wara li kien mixli li hedded qassis bi mqass wara li dan tah biċċa pizza meta huwa talbu xirja. L-Ispettur Kurt Farrugia qam fil-Qorti li fit-18 ta’ Awwissu, għall-ħabta tal-4.00pm fil-Knisja ta’ Santa Tereża, l-imputat allegatament hedded lill-qassis u ħebb għalih kif ukoll li ġarr sikkina u li anke kiser sentenzi tal-Qorti.
Il-prosekuzzjoni spjegqalet li l-akkużat mar talab xirja talikel imma l-qassis offrielu biċċa pizza u kien hawn li allegatament l-akkużat beda jirrabja u heddu.
L-Avukat Matthew Charles Zammit, li qed imexxi d-difiża, talab għall-ħelsien mill-arrest iżda l-prosekuzzjoni oġġezzjonat għax hemm persuni li se jissejħu biex jixhdu kif ukoll għax qalet li m’huwiex affidabbli.
Il-Maġistrat Gabriella Vella qalet li fid-dawl tal-fatt li għad irid jixhed il-vittma kienet qed tiċħad it-talba għall-ħelsien mill-arrest.