Raġel li allegatament ipponta pistola lejn il-mekkanik tiegħu u pprova jsuq għal fuqu b’karozza wara tilwima dwar il-kwalità ta’ xogħol li kien għamillu, inżamm arrestat fuq diversi akkużi.
Zven Azzopardi ta’ 19-il sena mill-Gudja kien mixli li hedded lil mekkanik f’Bormla nhar l-10 ta’ April li għadda, li kellu arma fil-pussess tiegħu u munizzjon mingħajr liċenzja u li żamm lill-allegat vittma kontra r-rieda tiegħu fost oħrajn.
Akkużi oħra miġjuba kontra tiegħu jgħidu li saq vettura b’mod perikoluż, li għamel użu ħażin ta’ tagħmir ta’ komunikazzjoni elettronika, li uża dak l-apparat biex jhedded li jwettaq reat u li sar reċediv.
L-Ispettur Darren Buhagiar, li mexxa l-Prosekuzzjoni, spjega fil-Qorti kif it-Tnejn filgħaxija, il-pulizija kienu rċevew rapport dwar inċident vjolenti fejn karozza kienet allegatament misjuqa fuq persuna u wara ġiet appuntata arma tan-nar lejha.
Uffiċjali mir-Rapid Intervention Unit nbagħtu fiż-żona fi sforz biex jinstab is-suspettat iżda ma nstabx. Għall-ħabta tas-1.00 a.m. tal-għada filgħodu, l-imputat kien mar minn jeddu l-għassa fejn ġie arrestat.
Azzopardi wieġeb mhux ħati tal-akkużi miġjuba kontra tiegħu. Il-Prosekuzzjoni oġġezzjonat għat-talba għall-ħelsien mill-arrest tiegħu u argumentat li l-imputat kien qed jiffaċċja 16-il akkuża, li kienu jinvolvu reati serji li jinvolvu vjolenza, kif ukoll ksur tal-libertà proviżorja.
L-Ispettur Buhagiar żied jgħid li Azzopardi kien joqgħod fi proprjetà mikrija fil-Gudja, li ma kienx l-indirizz stipulat fil-kundizzjonijiet tal-libertà proviżorja tiegħu. Barra minn hekk, għad baqa’ diversi xhieda pajżana li għad iridu jixhdu.
Il-Qorti ċaħdet it-talba għal-libertà proviżorja u ordnat li Azzopardi jinżamm arrestat, kemm minħabba n-natura tal-akkużi kif ukoll minħabba l-fatt li għad baqa’ numru ta’ xhieda li għad iridu jagħtu x-xhieda tagħhom f’dawn il-proċeduri.
L-Avukati Franco Debono u Marion Camilleri dehru għall-imputat.
