Roderick Tabone ta’ 34 sena u Jason Attard ta’ 46 sena tressqu l-Qorti mixlija b’lista twila ta’ akkużi, fosthom serq u pussess aggravat ta kokaina.
Fil-Qorti, Attard ammetta l-akkużi miġjuba fil-konfront tiegħu filwaqt li l-akkużat l-ieħor wieġeb li mhux ħati.
Fis-seduta tal-qorti ħareġ il-fatt li mis-26 ta’ Marzu, l-akkużati allegatament bdew iwettqu serje twila ta’ serq fejn allegatament serqu minn stabbiliment tal-logħob.
Minn hawnhekk il-Pulilzija bdiet l-investigazzjoni tagħha waqt li ż-żewġt irġiel allegatament wettqu aktar serqiet bi vjolenza.
Mill-investigazzjoni tagħha, il-Pulizija waslet biex tidentifika lil Attard bħala wieħed mis-suspettati. Kien nhar il-Ġimgħa li għadda meta l-Pulizija ċċirkondat karozza fejn fiha sabu liż-żewġ imputati.
Allegatament fil-karozza nstabu sitt qratas kokaina u ammont żgħir ta’ flus kontanti.
Id-Difiża ma talbitx għall-ħelsien mill-arrest ta’ Tabone u b’hekk inżamm arrestat filwaqt li s-sentenza ta’ Attard se tkun qed tingħata fil-jiem li ġejjin.
