Madwar id-dinja kollha ftit tal-jiem ilu ġie mfakkar il-jum iddedikat għad-dijabete, bit-tema magħżula għal din is-sena tittratta l-approċċ ħolistiku li jagħti s-setgħa lin-nies fil-vjaġġ tad-dijabete. It-tema tenfasizza fuq l-importanza li jitnaqqas ir-riskju tad-dijabete u li jiġi żgurat li n-nies kollha li jbatu bid-dijabete jkollhom aċċess għal trattament u kura ta’ kwalità.
Ta’ min wieħed għalhekk jieqaf u jirrifletti dwar x’qed isir ukoll f’pajjiżna fejn tidħol din il-kundizzjoni. Huwa stmat li f’Malta hawn ftit aktar minn 10% tal-popolazzjoni li għandhom din il-kundizzjoni, li taffettwa l-mod kif il-ġisem tagħna juża z-zokkor li ġej mill-ikel u jidħol fid-demm.
Mhux darba jew tnejn li minn dawn il-kolonni tkellimna fuq il-benefiċċju li wieħed jagħmel xi tip ta’ eżerċizzju fiżiku filwaqt li jagħmel dieta bilaċjata jew jiekol ikel li huwa sustanzjuż għas-saħħa. Bla dubju nemmnu li l-eżerċizzju fiżiku huwa importanti ferm għal ħajja sana u jista’ jgħin biex jipprevjeni milli l-bniedem jiżviluppa ċertu kundizzjonijiet mediċi.
Intant, għandna għax nifhmu wkoll li l-Gvern qed jagħmel il-parti tiegħu fejn jidħol id-dijabete. Dan hekk kif qed ikompli jiġi estiż is-servizz tal-Continuous Glucose Monitoring biex dan is-servizz jilħaq aktar persuni. Għalhekk permezz ta’ investiment ta’ €300,000, dan is-servizz ser ikun qed jiġi estiż għal dawk li għandhom bejn 46 u 50 sena u li għandhom il-kundizzjoni dijabete tip 1.
Quddiem dan kollu nemmnu li se tkompli l-ħidma mal-pazjenti u l-professjonisti tal-kura tas-saħħa biex ikompli l-monitoraġġ tad-dijabete u sabiex jinstabu modi innovattivi biex tkompli tiġi kkontrollata din il-kundizzjoni lokalment, filwaqt li jkomplu jassistu lill-pazjenti li jbatu minn din il-kundizzjoni.
Konvinti li l-Gvern, bħalma qed iżid il-vot fuq is-saħħa, hekk ukoll nemmnu li parti sostanzjali minn dan il-vot se jmur għall-kura ta’ kundizzjonijiet speċifiċi bħalma hi d-dijabete.
