Minn Cristian Muscat
Kif bdiet l-imħabba tiegħek lejn il-futbol?
L-imħabba tiegħi għall-futbol bdiet minn età żgħira ħafna. Missieri kien jieħu kemm lili kif ukoll lil ħija fin-nursery ta’ Floriana FC waqt li kien imur jaħdem fil-ħanut tal-familja tagħna. Minn hemm, hekk kif avvanzajt fil-livelli differenti tan-nursery, bqajt ninħobb aktar u aktar il-logħba.
Missieri dejjem inkoraġġiena nibdew nilgħabu l-futbol għax, meta kien iżgħar, kien jilgħab ukoll fin-nursery ta’ Floriana. Sfortunatament, kellu jieqaf f’età żgħira minħabba injury, imma dejjem ried li t-tnejn li aħna nkomplu nimxu fil-passi tiegħu. Dik il-passjoni li kellu għal-logħba għaddiet lilna, u saret parti kbira minn ħajti minn età żgħira.
Ħa mmur mal-ewwel għall-punt. Kif qed thares lejn l-esperjenza ġdida tiegħek ma’ Zurrieq FC?
Nemmen li dan il-pass huwa pass fid-direzzjoni t-tajba għall-karriera tiegħi. Zurrieq FC stabbilew ruħhom bħala wieħed mit-timijiet konsistenti fil-Challenge League, u bl-istaff tekniku attwali, l-iskwadra li qed tinbena, u l-organizzazzjoni professjonali li tgħaqqad il-klabb, ninsab fiduċjuż ħafna li nistgħu nagħmlu staġun mill-aqwa flimkien.
Ninsab ħerqan ħafna li nibda l-istaġun, naħdem ħafna mat-tim, u nittama li nilħqu l-miri tagħna u nagħmlu wieħed memorabbli kemm personalment kif ukoll għall-klabb.
X’tikkummenta dwar l-esperjenza issa passata tiegħek ma’ St Andrews FC, u kemm tgħallimt minnha?
Wara staġun fejn ħassejt li tlift lili nnifsi ftit f’termini tal-logħba tiegħi, St Andrews FC laqgħuni b’idejhom miftuħa, u għal dan dejjem se nkun grat. Matul iż-żmien tiegħi ma’ dan il-klabb, irnexxieli nerġa’ nsib lili nnifsi bħala plejer u nqajjem mill-ġdid il-passjoni u l-imħabba għall-futbol li kelli meta kont żgħir.
Kont fortunat biżżejejd li naħdem kemm ma’ plejers żgħażagħ ta’ talent li ġejjin minn nursery daqshekk prestiġjuża, kif ukoll ma’ plejers ta’ esperjenza li huma magħrufa sew fil-futbol Malti. Dik it-taħlita ta’ żgħażagħ u esperjenza għenitna nbiddlu d-direzzjoni li l-klabb kien sejjer fiha, u flimkien ksibna l-objettiv ewlieni tagħna li niżguraw finitura fl-aqwa 8 wara tliet staġuni diffiċli għall-klabb.
Xejn minn dan ma kien ikun possibbli mingħajr l-għajnuna tal-Kowċ Mauro Delceppo, li għamel xogħol eċċellenti biex iżomm l-iskwadra magħquda matul mumenti diffiċli matul l-istaġun. Ninsab kburi li ngħid li ħallejt lil St Andrews f’pożizzjoni aħjar minn meta ngħaqadt magħhom.
Kif tqis il-livell tal-futbol Malti fil-preżent?
Wara li ilni nilgħab fiċ-Challenge League għal numru ta’ snin issa, nista’ ngħid li l-livell tal-kampjonat qed jitjieb sena wara sena. B’aktar plejers Maltin b’esperjenza li niżlu mill-Premier League, il-kompetizzjoni saret aktar b’saħħitha u aktar impenjattiva, u dan qed jgħin biex tittejjeb il-kwalità ġenerali tal-kampjonat.
Fl-istess ħin, iċ-Challenge League sar pass importanti ħafna għall-plejers żgħażagħ biex jiżviluppaw il-karrieri tagħhom. Aktar klabbs qed jafdaw plejers iżgħar u jagħtuhom l-opportunità li jesperjenzaw il-futbol tal-kbar qabel ma jagħmlu l-qabża għall-ogħla livell tal-futbol Malti. Nemmen li dan qed jibbenefika kemm lill-plejers individwalment kif ukoll lill-futbol Malti kollu kemm hu.
U dak tar-riżorsi (grawnds) fejn titħarrġu u tilagħbu l-logħob kompetittiv tagħkom?
Fir-rigward tal-pitches użati fil-logħbiet kompetittivi, nistgħu napprezzaw li ż-żewġ grawnds ewlenin ġew irranġati dan l-aħħar u issa jipprovdu pitches tal-aqwa kwalità għall-plejers. Dan żgur huwa pass pożittiv għall-futbol Malti.
Madankollu, l-istess ma jistax jingħad għal ċerti grawnds ta’ taħriġ, peress li ħafna minnhom ilhom ma jiġu aġġornati għal numru ta’ snin. Il-kundizzjoni ta’ wħud minn dawn il-pitches tista’ żżid ir-riskju ta’ injuries għall-plejers, speċjalment meta wieħed iqis l-ammont ta’ taħriġ u logħbiet matul l-istaġun.
Nemmen li t-titjib tal-faċilitajiet ta’ taħriġ huwa importanti daqs it-titjib tal-istadji tal-logħbiet, għaliex uċuħ aħjar jgħinu lill-plejers jagħtu l-aħjar prestazzjoni tagħhom filwaqt li jipproteġu wkoll il-benesseri fiżiku tagħhom.
Kif qed tħares lejn il-futur tiegħek fil-futbol?
Kif semmejt qabel, il-futbol huwa parti kbira minn ħajti. Għalkemm, hekk kif nikbru, naturalment niżviluppaw prijoritajiet u responsabbiltajiet differenti, wegħedt lili nnifsi li dejjem se nsib ħin għal dan l-isport għax tani ħafna matul ħajti.
Kull meta nidħol fil-grawnd, dejjem nipprova nagħti l-100% tiegħi, għax fil-futbol qatt ma tkun taf meta tista’ tkun l-aħħar logħba tiegħek. Minn mindu kont żgħir, dejjem ħlomt li nilħaq l-ogħla livell tal-futbol Malti, u għalkemm il-futbol jista’ ma jkunx il-prijorità numru wieħed tiegħi f’dan l-istadju ta’ ħajti, xorta għandi dmir lejn dik il-verżjoni żagħżugħa tiegħi nnifsi li nibqa’ nimbotta u naħdem bis-sħiħ biex nipprova nilħaq dak il-għan.
Għalhekk l-għan tiegħi għall-futur huwa li nkompli naħdem bis-sħiħ staġun wara staġun, nitjieb bħala plejer u bħala persuna, u nagħmel dak kollu li nista’ biex eventwalment nilħaq dak il-livell.
Għaddi messaġġ finali lil min jixtieq jagħmmel karriera ta’ suċċess fil-futbol.
Il-messaġġ li nixtieq ngħaddi lit-tfal li jixtiequ jeċċellaw f’dan l-isport huwa li jgawdu kull sessjoni ta’ taħriġ u kull mument fil-grawnd.
Il-futbol huwa vjaġġ mimli lezzjonijiet, għalhekk ħu kull parir li tirċievi bħala opportunità biex titgħallem u titjieb, kemm bħala plejer kif ukoll bħala persuna.
Ilgħab kull partita bħallikieku kienet l-aħħar tiegħek, dejjem agħti l-massimu tal-isforz tiegħek, u qatt tinsa għaliex bdejt dan il-vjaġġ fl-ewwel lok.
Il-passjoni u l-imħabba għal-logħba għandhom dejjem ikunu r-raġuni ewlenija għaliex tilgħab.