Minn Cristian Muscat
Kif bdiet l-imħabba tiegħek lejn il-futbol?
L-imħabba tiegħi lejn l-isbaħ logħba fid-dinja, kif inħobb insejħilha jien, anki mat-tfal li nikkowċja, bdiet minn età żgħira ħafna. L-iskola minn dejjem ħabbejtha u tajtha importanza kbira, però l-ħin liberu tiegħi, speċjalment fis-Sajf, dejjem qattajtu nilgħab barra fil-pjazez u t-toroq ma’ tfal ta’ kull età. Kelli ballun isfar tal-plastik, li għadu għandi sal-lum, li kont nieħdu miegħi litteralment kullimkien u bil-lejl inraqqdu miegħi. Għalija l-ballun kien kollox u kont inħossu jikkomfortani u jagħtini sens ta’ sigurtà.
Mill-età ta’ madwar seba’ snin missieri beda jtellagħni l-istadium Ta’ Qali u waqt li ħafna mit-tfal l-oħrajn kienu joqogħdu jilagħbu isfel wara l-fence tal-ħadid minflok jaraw il-logħba, jien kont noqgħod kwiet maġenbu nsegwi b’attenzjoni kbira. F’dik il-ħabta kien kitibni fi Skolasport, il-Marsa, għax ommi ma riditx li nitħarreġ aktar minn darba fil-ġimgħa, billi dak iż-żmien kienu bosta l-ġenituri li ma tantx kienu jemmnu fl-importanza tal-isport, mentalità li llum inħoss li nbidlet ħafna. Aktar tard imbagħad, fil-bidu tal-adoloxxenza tiegħi, ingħaqadt mat-team tal-lokalità fejn trabbejt u għext żgħożiti, jiġifieri Santa Luċija, fejn qattajt snin sbieħ nilgħab.
Wara snin wieqaf kompletament mil-logħba li tant inħobb, sabiex stajt niffoka aktar fuq il-karriera tiegħi ta’ traduttur, ġietni opportunità li nibda l-coaching mal-club ta’ Msida St. Joseph, fejn qattajt erba’ staġuni, u minn hemm qatt ma ħarist lura.
Iddeskrivi r-rwol tiegħek bħala Head of Development u kowċ fi ħdan l-Akkademja ta’ Sliema Wanderers FC.
Il-klabb ta’ Sliema għandu President u grupp ta’ nies madwaru li tassew jemmnu fin-Nursery, li ma jittrattawhiex bħala xi ħaġa sekondarja, anzi jinvestu fiha u jagħmlu minn kollox biex jarawha tikber u tissaħħaħ. Sena ilu ttieħdet id-deċiżjoni riskjuża iżda għaqlija li l-Akkademja tinqasam fi tliet setturi – Grassroots, Development u Competitive, fejn f’kull settur ġie impjegat coach ta’ esperjenza fuq bażi full-time biex jikkoordina s-settur tiegħu u jiddedika attenzjoni massima fuqu.
Niddeskrivi s-settur tiegħi – tad-Development – li jkopri mill-Under 10 sa 13, bħala pont ta’ tranżizzjoni mill-età bikrija, fejn it-tfal jiġu introdotti għal-logħba tal-futbol, għall-fażi kompetittiva (mill-Under 14 ‘il fuq). Huwa settur kruċjali ħafna għall-iżvilupp olistiku tat-tfal, fejn l-isfidi ma jonqsux, iżda fejn is-sodisfazzjon huwa kbir ħafna wkoll. Ir-rwol tiegħi jinvolvi taħlita sabiħa ta’ xogħol fil-grawnd, fejn insegwi mill-qrib is-sessjonijiet u l-logħbiet kważi kollha u nkun qrib il-coaches kollegi tiegħi kemm nista’, kif ukoll ħafna xogħol ieħor fl-uffiċċju li ma jaqta’ xejn. Nipprova nżomm komunikazzjoni kontinwa mal-ġenituri kollha għax nemmen li huma u wliedhom – li huma s-sinsla tagħna – jixirqilhom biss l-aqwa trattament.
Barra minn hekk, dan l-istaġun se nkun qed nikkowċja t-team tal-Under 12s, għaliex żgur ma nimmaġinanix u ma nissaportix li ma nkunx qed nikkowċja tim.
Huwa fatt magħruf li t-tim tal-kbar ta’ Sliema Wanderers FC qed jutilizza numru ta’ plejers prodotti tan-Nursery. X’taħseb li huwa s-sigriet marbut ma’ dan is-suċċess?
Ma naħsibx li hemm sigrieti. Hemm biss ħidma kontinwa mill-kowċis kollha tagħna, bl-għan aħħari dejjem ikun li naraw li l-plejers żgħażagħ tagħna jkunu teknikament, tattikament, fiżikament u, ma’ dawn inżid ukoll mentalment, lesti biex jagħmlu l-pass li jmiss. Huwa fatt magħruf li llum sar aktar diffiċli li plejer ta’ età żgħira jagħmilha mal-iskwadra ewlenija u jilgħab b’mod regolari, apparti li lkoll nafu li mhux kulħadd se jagħmilha fil-futbol, speċjalment fl-ogħla livell, iżda l-għan u l-pjaċir tagħna bħala coaches huwa li naraw kemm jista’ jkun prodotti tal-Akkademja tagħna jiddebuttaw mat-tim tal-kbar. Il-coaches u l-istaff tal-kbar isegwu l-progress tal-plejers żgħażagħ mill-qrib u meta jasal il-mument jagħtu ċ-ċans lil min tassew ikun ħaqqu.
Kif tqis il-livell tal-grassroots f’pajjiżna?
Nemmen li minn meta kont tifel jien sal-lum saret qabża kbira ‘l quddiem. Il-maġġoranza kbira tal-coaches f’pajjiżna huma kwalifikati u jżommu ruħhom aġġornati kontinwament. Ħafna clubs qed jagħżlu li jinvestu fl-apparat u fl-aktar riżorsa importanti – dik umana, u dan qed iwassal biex ħafna tfal qed jingħataw taħriġ tajjeb, li jgħinhom jitjiebu u joħorġu l-aqwa potenzjal tagħhom.
U dak tal-futbol Malti fil-preżent, u kif rajtu jinbidel tul is-snin?
Fir-rigward ta’ dan il-punt għandi fehmiet imħalltin. Nemmen li għal xi raġuni, dak il-ħafna xogħol tajjeb li qed isir fin-nurseries mhux qed jissarraf biżżejjed f’football ta’ livell għoli fil-livell tas-Seniors. Fil-livell tal-Youths qed naraw ħafna żgħażagħ kapaċi u b’potenzjal kbir, biss ħafna jieqfu wara l-Minors għaliex isibuha bi tqila biex jinfiltraw fit-timijiet tal-kbar u sfortunatament jispiċċaw jaqtgħu qalbhom. Niftakar żmien meta setgħu jilagħbu massimu ta’ tliet plejers barranin u dawn tista’ tgħid kienu jkunu kollha ta’ stoffa u jgħollu l-livell tal-logħba. Illum ma naħsibx li dan għadu l-każ, jiddispjaċini ngħid.
U dak tar-riżorsi (grawnds) fejn titħarrġu u tilagħbu l-logħob kompetittiv tagħkom?
Bħala Sliema, kburi ngħid li għandna faċilitajiet tajbin ħafna, u l-grawnd tagħna jilqa’ fih l-etajiet kollha, jiġifieri minn tfal ta’ taħt il-ħames snin sat-tim tal-kbar, ilkoll f’kumpless wieħed. Ħafna mill-klabbs madwar Malta għandhom faċilitajiet tajbin ukoll u jfittxu li jagħmlu investiment kontinwu biex iżommuhom fl-aqwa kundizzjoni. Sfortunatament però, ir-riżorsi u l-faċilitajiet tagħna huma xorta dak li huma, meta mqabblin ma’ barra, iżda inutli noqogħdu nilmentaw u naraw it-tazza nofsha vojta, dmierna hu li nimmassimizzaw ir-riżorsi tagħna, nagħmlu l-aħjar użu minnhom u nibżgħu għalihom.
Kif qed tħares lejn il-futur tiegħek fil-futbol?
Il-kowċing huwa sabiħ, fost l-oħrajn, għaliex jagħtik kull opportunità li toħlom u timraħ. Imma trid taħdem u tistinka, trid tkun lest li tagħmel ħafna sagrifiċċji, li tkun hemm l-ewwel wieħed biex tiftaħ il-grada u jekk ikun hemm bżonn tibqa’ l-aħħar wieħed fid-dlam biex terġa’ tagħlaq u titfi kullimkien. Fuq kollox trid tkun lest li titgħallem mingħand kulħadd u ma tiddejjaqx tistaqsi fejn ma tafx. Inqis il-coaching bħala vjaġġ mingħajr destinazzjoni, għaliex qatt ma tista’ tgħid li wasalt.
Bħal kulħadd għandi ħafna ħolm u aspirazzjonijiet, iżda fil-mument ninsab kuntent f’dan ir-rwol u parti minn dan il-klabb glorjuż, u dmiri huwa li flimkien ma’ sħabi nkompli nsaħħaħ il-pedamenti biex niżguraw li n-nursery tagħna tkun fejn jixirqilha, jiġifieri fost l-aqwa ta’ Malta. Fuq kollox, irrid li nkompli nrawwem l-imħabba lejn il-logħba fil-qlub tat-tfal tagħna u naċċerta ruħi li nagħmlu minn kollox biex niżviluppawhom mhux biss fi plejers aħjar, iżda aktar importanti minn hekk, f’persuni aħjar.
Għaddi messaġġ finali lil min jixtieq jagħmel karriera ta’ suċċess fil-futbol.
Nemmen li erba’ ingredjenti fundamentali għal kull min irid jasal, mhux biss fil-futbol, iżda fil-ħajja b’mod ġenerali, huma l-umiltà, id-dedikazzjoni, il-passjoni u l-professjonalità. Kull min jipprattika dawn il-valuri bis-sħiħ jista’ jikseb suċċess f’kulma jagħmel u jirbaħ ir-rispett u l-fiduċja min-nies ta’ madwaru.