Alex Borg, nhar it-Tnejn, kellu l-ewwel okkażjoni ta’ diskors ta’ importanza politika kbira. Sagħtejn risposta għall-budġet li nħlew f’diskors b’nuqqas ta’ viżjoni, nuqqas ta’ koerenza u argumenti bbażati fuq skorettezzi.
Kien hemm ħafna tama f’Alex Borg mill-partitarji tal-PN u bosta kienu qed jistennew messaġġ b’saħħtu, imma minn dak li wieħed seta jsegwi t-Tnejn li għadda fil-Parlament, ma tantx seħħ wisq.
Jirrepeti l-invenzjoni dwar iż-żieda
Alex Borg, minkejja li jaf li qed imeri s-sewwa magħruf, reġa’ rrepeta l-ħrafa tiegħu li l-kabinett tal-Ministri ta xi żieda kif għamel il-Prim Ministru Gonzi. Ipprova joħloq issue fuq fatti skorretti partikolarment fuq din il-kwistjoni. MInkejja li fl-aħħar jiem, bosta kienu dawk li urew bil-fatti li dak li qed jistqarr il-Kap tal-Oppożizzjoni huwa skorett, xorta għażel li jibqa’ jirrepeti din il-ħrafa fid-diskors tiegħu.
Jattakka ż-żieda tal-Pensjonijiet
Il-PN fil-gvern ma kienx magħruf biex jagħti żidiet fil-pensjonijiet. Anzi, l-anzjani jiftakru kif il-pensjonijiet kienu fil-friża u l-ħaddiema jiftakru li l-PN kien jiddubita jistax jibqa’ jiffinanzja l-pensjonijiet. Dan il-gvern, bil-fatti li ma jista’ jmerihom ħadd, sena wara oħra qed iżid il-pensjonijiet. Żidiet mħux tal-għoli tal-ħajja biss, imma żidiet addizzjonali li qed jagħmlu l-pensjonijiet aktar b’saħħithom.
Fid-diskors tiegħu, il-Kap tal-Oppożizzjoni Alex Borg, ħareġ b’waħda inkredibbi. Attakka s-sewwa magħruf li l-pensjonanti se jkollhom €10 żieda fil-ġimgħa. Skont l-hekk imsejħa loġika tiegħu qal li mhux minnu lih żieda ta’ €10 għax parti minnhom huma l-€4.66 tal-għoli tal-ħajja. Imma dan x’tip t’argument hu? Il-gvern ħabbar żieda ta’ €10 u l-pensjonijiet daqshekk se jiżdiedu.
Argumenti imħawda fuq il-popolazzjoni
Min segwa d-diskors sema l-argumenti ma jreġux dwar iż-żieda fil-popolazzjoni. Il-Kap tal-Oppożizzjoni pprova jitkellem dwar dak li qed jitkellmu dwaru in-nies imma żgur ma weriex li għandu xi viżjoni jew jaf eżatt dwar xiex qed jitkellem.
L-ewwel nett, iż-żieda fil-ħaddiema barranin ma tkabbarx l-ekonomija. Il-ħtieġa ta’ ħaddiema barranin seħħ għaliex kien hemm tkabbir ekonomiku. Qatt smajtu b’xi ħadd li jitlaq minn pajjiżu biex imur f’pajjiż ieħor fejn m’hemmx xogħol imma jmur biex tikber l-ekonomija f’dak il-pajjiż bil-preżenża tiegħu?
Il-ħaddiema jitilqu minn pajjiżhom u jmorru f’pajjiż ieħor fejn jafu li se jsibu x-xogħol. Hawn Malta dak li seħħ u jekk il-Kap tal-Oppożizzjoni jitkellem ma’ min iħaddem malajr jispjegawlu fi kliem sempliċi ħafna dan kollu. Il-ħaddiema barranin li qed jiġu huma meħtieġa tant li ż-żieda fil-popolazzjoni bil-ħaddiema barranin seħħet waqt li n-numru ta nies li jirreġistraw dejjem baqa jonqos.
Kull diskussjoni dwar il-popolazzjoni u l-ħaddiema barranin trid titlaq minn dan il-punt u magħha trid iżżid il-kwistjoni tar-rata tat-twelid f’pajjiżna.
Tgerfix dwar it-turiżmu
Il-Kap tal-oppożizzjoni għamel argument ma jinftiegemx dwar it-turiżmu u l-kontribuzzjoni li kull turist irid jagħmel meta jiġi Malta. Mela minn banda Alex Borg jgħid li jrid it-turiżmu ta’ kwalità u fl-istess ħin ikkritika li l-kontribuzzjoni ta’ €1.50 se tagħmel ħsara lit-turiżmu. Aħjar jiddeċiedi eżattament xi jrid.
L-ewwel nett, il-kontribuzzjoni hija meħtieġa biex tagħmel tajjeb għall-ispejjeż li jkunu meħtieġa għal upkeep tal-pajjiż. Il-gvern qed iwieġeb għal sejħiet li saru marbuta ma’ dan il-punt imma l-Kap tal-Oppożizzjoni ma jafx eżatt x’jaħseb fuq dan il-punt.
It-tieni, jekk irridu turiżmu ta’ kwalità, se ninkwetaw għaliex il-contribution minn 50 ċenteżmu se tiġi €1.50? Turist ta’ kwalità jkun dak li tagħmillu differenza fil-kontribuzzjoni ta’ euro?
Iressaq proposti ta’ dak li qed isir diġà
Alex Borg qed jgħid li għandu l-proposti u li għad fadallu x’joħroġ proposti. Mad-daqqa t’għajn ta’ dawn il-proposti tinnota li ma tantx hemm affarijiet ġodda. Pjuttost hemm proposti li diġà qed iseħħu u li qed isir xogħol dwarhom.
Bosta diġà kkummentaw li l-PN għandu ħabta jew qabel l-elezzjoni jew fl-oppożizzjoni jibda’ jwiegħed it-tnaqqis fit-taxxa. Bosta kkummentaw wkoll li meta jsiru dawn il-wegħdi mill-PN, kif sar wara l-elezzjoni tal-2008, dawk il-wegħdi jisfumaw fix-xejn.
Kredibilità
Fil-politika l-aktar ħaġa importanti hija li tkun kredibbli. Il-kredibilità ma tiksibhiex b’diskors bħal tal-bieraħ speċjalment meta l-PN meta kien fil-gvern nafu eżattament kif mexa. Mid-diskors tat-Tnejn li għadda tista’ tgħid li Alex Borg jgħid ħafna affarijiet imma eżattament fejn irid jieħu l-pajjiż jekk il-poplu jafdah ħadd għadu ma fehem.