Ousmane Dembele jinsab lest li jestendi l-kuntratt tiegħu ma’ Barcelona u li jibqa’ mal-club lil hinn minn dan is-sajf.
Il-player ta’ 24 sena se jara l-ftehim attwali tiegħu fil-Camp Nou jiskadi f’Ġunju u issa huwa liberu li jiffirma ftehimiet ta’ qabel il-kuntratt ma’ clubs barranin.
Wara r-rebħa ta’ 4-0 ta’ Barcelona fuq Athletic Bilbao ix-xahar li għadda, li fiha Dembele skorja u pprovda assist, il-coach Xavi żvela li “ma tkunx problema” jekk il-winger jimpenja l-futur tiegħu mal-ġganti Katalani.
Huwa mifhum li Dembele ħalla l-bieb miftuħ biex jiffirma kuntratt ġdid ma’ Barcelona, minkejja li fl-aħħar ġimgħat ma saru l-ebda taħdidiet bejn l-aġent tiegħu u l-club.
Jidher li Dembele kien kuntent ħafna ma’ Barcelona mill-wasla ta’ Xavi f’Novembru, bil-winger jidher fi 12-il logħba fil-kompetizzjonijiet kollha taħt il-gwida tal-coach Katalan.
Dembele, li qabel kien marbut ma’ Chelsea, Manchester United u Paris Saint-Germain, huwa maħsub li m’għandux għaġġla biex jiddeċiedi fejn jinsab il-futur tiegħu u huwa ffukat bis-sħiħ biex itemm l-istaġun bil-qawwa ma’ Barcelona.
