Il-kelb tad-Dwana Peter ngħata l-unur tal-aqwa kelb bl-uniformi fl-ewwel edizzjoni tal-Malta Animal Honours Award imtella’ mill-Ministeru għad-Drittijiet tal-Annimali flimkien mal-Kummissarju għall-Ħarsien tal-Annimali.
Il-kelb; li għandu 5 snin; beda jagħti s-servizz tiegħu mad-Dwana Maltija fl-1 ta’ April tal-2018. Peter daħal fis-servizz fl-20 ta’ Settembru tal-istess sena wara perjodu ta’ taħriġ u ngħata l-liċenzja fil-15 ta’ Novembru.
F’inqas minn tliet snin fis-servizz, Peter kien kruċjali fil-ħidma tiegħu f’84 qabda, fosthom 27 qabda relatati ma’ flus mhux dikjarati li jammontaw għas-somma ta’ €598,859. Huwa rnexxielu jxomm ukoll 54 każ ieħor relatati mat-tabakk b’total ta’ 150 kilogramma u tliet każijiet ta’ droga kannabis u kokaina.
