Rangers ħatru lill-eks coach ta’ Monaco u Club Bruges, Philippe Clement, bħala l-manager il-ġdid tagħhom b’kuntratt ta’ tliet snin u nofs.
L-eks difensur tal-Belġju ta’ 49 sena se jieħu post Michael Beale, li tkeċċa aktar kmieni dan ix-xahar.
Clement tkeċċa minn Monaco f’Ġunju wara 18-il xahar fit-tmexxija meta t-team tiegħu spiċċa fis-sitt post ta’ Ligue 1.
Iċ-chairman tar-Rangers, John Bennett, qal li l-Belġjan kien “il-kandidat eċċellenti fil-kriterji ewlenin kollha”.
Huwa qal li l-“proċess ta’ reklutaġġ ippjanat bir-reqqa u komprensiv” sar minn team immexxi mill-kap eżekuttiv, James Bisgrove, membri tal-bord u l-eks player u manager tar-Rangers, Graeme Souness, matul 10 ijiem li matulhom intervistaw “diversi kandidati ta’ kalibru għoli”.
Il-club tal-Premiership Skoċċiż kien irrappurtat li naqqas il-lista qasira tagħhom għal tnejn – Clement u l-coach ta’ Yokohama Marinos, il-Malti/Awstraljan, Kevin Muscat, li huwa eks difensur ta’ Rangers.
Clement lagħab ma’ Beerschot, Genk u Coventry City, kif ukoll għamel 38 dehra għal pajjiżu.
