(F’għeluq l-ewwel sena minn meta mar jiltaqa’ mal-Ħallieq)
Meta kont żgħir ridt issir tabib jew qassis,
Minn ċkunitek mimli ħeġġa biex tkun ta’ ġid,
Smajt is-sejħa tal-Mulej u weġibt iva,
F’missjoni, miegħu kkollaborajt id f’id.
Għext il-fidi b’mod ħaj u b’awtentiċità,
L-eżempju tiegħek kien l-aqwa omelija,
Kont qassis li għamilt ħoss li ħalla effett,
Minnek ħareġ il-kuraġġ, tat-tama d-dija.
Tant erwieħ imtaqqla fittxewk, Ġrew għal għandek,
Il-poplu għarfek bħala bniedem sensibbli,
Ma tirrifjuta lil ħadd, Tilqa’ lil kulħadd,
Minn qalbek b’umiltà dejjem disponibbli.
Gelglu minnek widien ta’ faraġ u mħabba,
Ma tiġġudikax u tifhem, tagħder u tħenn,
Ksibt il-fiduċja sħiħa ta’ qlub imġarrba,
Hekk li ħafna nies sabu fik missier ta’ kenn.
“Jien inħobbhom in-nies”, kont tgħid bi tbissima,
Kemm demgħat xerridt fin-niket u l-ferħ tagħhom!,
Fik raw persuna li jimpurtaha minnhom ,
Li timxi l-mixja mżewqa tal-ħajja magħhom.
L-avventura ta’ ħajtek waslet fi tmiemha
u l-Missier riedek tmur tgawdiH fl-eternita’,
Malta bkietek u tatek tislima t’eroj,
Ħallejt vojt imma wkoll sens ta’ serenità.
‘’F’kull waqgħa hemm iż-żerriegħa ta’ qawmien ġdid’’,
“Inħobbok’’, kliem li jibqa’ jidwi tul is-snin,
Xtaqt li l-legat li ħallejt jibqa’ jagħti l-frott
u fih il-memorja tiegħek qatt mhi se tnin.
ALISON TONNA