Bi tmienja mill-10 logħbiet mit-30 programm tal-Premier League Ingliż skedati għal-lum, l-attenzjoni prinċipali hija mixħuta fuq iż-żewġ logħbiet ta’ għada li fihom huma nvoluti l-ewwel tliet timijiet fil-klassifika, Arsenal, Liverpool u Manchester City, għalkemm il-logħbiet kollha għandhom l-importanza tagħhom.
Is-City se jospitaw lil Arsenal fl-Etihad Stadium f’partita importanti għaż-żewġ timijiet hekk kif it-taqtiegħa għat-titlu qed tisħon sewwa. Bħalissa, it-taqtiegħa għat-titlu hija bejn tliet timijiet separati b’punt wieħed biss meta fadal 10 logħbiet oħra għat-tmiem tal-istaġun.
Arsenal jinsabu ftit ’il fuq mis-City b’vantaġġ ta’ punt. Huma għandhom l-aħjar rekord tal-goals b’total ta’ 70 dan l-istaġun b’medja ta’ 2.50 goal kull logħba. Difensivament, huma sofrew biss 24 goal u żammew lill-avversarji tagħhom mingħajr ma jiskorjaw għal 11-il darba.
Il-vantaġġ tas-City huwa li se jilagħbu f’darhom fejn dejjem juru konsistenza tremenda. Huma skorjaw 63 goal fi 28 logħba għal medja ta’ 2.25 goal kull logħba.
Huma lagħbu tajjeb ukoll fid-difiża peress li dan l- istaġun ċedew biss 28 goal u żammew lill-avversarji mingħajr ma jiskorjaw tmien darbiet.
Peró wieħed irid jara kemm se jkun hemm players neqsin minn dawk li weġġgħu mat-timijiet nazzjonali tagħhom fejn is-City kellhom lil Kyle Walker u John Stones u l-Gunners lil Bukayo Saka, kollha mal-Ingilterra.
Fl-aħħar ħames ħarġiet Arsenal rebħu l-logħbiet kollha waqt li s-City fallew erba’ punti f’żewġ draws.
Il-logħba l-oħra ta’ għada tara lil Liverpool jospitaw lil Brighton fejn xejn inqas minn rebħa ma hija tajba għalihom meta ġejjin minn draw kontra Manchester City.
Qabel ma ġew eliminati mill-FA Cup huma kellhom ċans li jirbħu erba’ unuri, iżda xorta għad jistgħu jirbħu t-Treble bil-kampjonat huwa għadma iebsa għat-tliet protagonisti speċjalment għalihom li jkollhom f’moħħhom iż-żewġ unuri l-oħra.
Min-naħa tas-Seasiders huma jidhru li naqqsu xi ftit mill-istaġun ta’ qabel tant li fl-aħħar ħames logħbiet ħadu seba’ punti minn possibbiltá ta’ 15.
It-team fir-raba’ post, Aston Villa, se jkunu nvoluti fid-derby tal-Midlands meta jilqgħu lil Wolves f’Villa Park fil-partita ta’ waqt it-te’.
Iż-żewġ timijiet iridu r-rebħa għal raġuni jew oħra għax jekk Wolves qed jippruvaw jikkwalifikaw għall-Ewropa, l-għan tal-Villa huwa li jkunu fiċ-Champions League, xi ħaġa li ilhom ma jagħmlu għal dawn l-aħħar 42 sena.
Bħalissa t-team ta’ Unai Emery għandu tliet punti vantaġġ fuq Tottenham u disgħa fuq Manchester United iżda t-tnejn lagħbu logħba inqas minnhom. Għalhekk iridu joqogħdu ferm attenti li ma jfallux xi punti.
Fuq il-karta Tottenham jidhru li għandhom jegħlbu lil LutonTown fit-Tottenham Stadium iżda l-football ma jintlagħabx fuq il-karti.
Madankollu, Spurs għandhom munizzjon biżżejjed biex jieħdu t-tliet punti għalkemm il-Hatters jafu jiġu mkaxkra u anke jissorprendu.
Manchester United se jmorru għand Brentford fil-logħba ta’ tard illum filgħaxija meta jafu l-konsegwenzi jekk joħorġu telliefa meta bħalissa l-club għaddej minn ristrutturar kbir wara li Sir Jim Ratcliffe issa għandu kważi t-tmexxija tat-team f’idejh jew almenu se jkunu jekk fis-sajf jeħles ill-manager Olandiż, Erik ten Hag.
Dan għadu fil-kariga grazzi għar-rebħa fuq Liverpool fl-FA Cup li hija l-unika kompetizzjoni li jistgħu jirbħu dan l-istaġun minbarra li jtemmu fir-raba’ post fil- kampjonat.
Il-United ħadu tliet rebħiet u sofrew żewġ telfiet mill-aħħar ħames logħbiet iżda l-Bees marru ħażin ħafna meta ħadu draw biss minn daqstant logħbiet.
Newcastle se jkunu f’St James Park kontra West Ham meta dawn jinsabu erba’ punti aħjar minnhom bit-tnejn ikollhom riżultati mħallta kważi identiċi li minnhom il-Magpies ħadu seba’ punti u l-Hammers tmienja minn 15 kull wieħed.
Bournemouth se jkunu f’darhom kontra Everton li jinsabu erba’ punti bogħod miż-żona l-ħamra biċ-Cherries nistgħu ngħidu li huma virtwalment salvi meta jinsabu 14-il punt mit-tielet team mill-aħħar.
Chelsea, li prattikament huma barra mill-Ewropa meta jinsabu fil-11-il post, jidher li se jkollhom logħba li jistgħu jirbħu meta jkunu fi Stamford Bridge kontra Burnley li kellhom staġun negattiv tant li jidhru li se jirritornaw minn fejn ġew għalkemm bi sforz qawwi jistgħu jevitaw ir-relegazzjoni.
Nottingham Forest, li jinsabu f’sitwazzjoni prekarja, se jkunu fis-City Ground kontra Crystal Palace li jinsabu tmien punti iktar minnhom. Għalhekk din il-logħba hija ferm importanti għat-team ta’ Nuno Espirito Santo biex iżommu posthom mal-kbar wara li ġew kastigati erba’ punti għal ksur tar-regoli tal-Profitt u s-Sostenibbiltá tal-Premier League.
Fil-logħba l-oħra t-team tal-qiegħ, Sheffield United, se jkunu fi Bramall Lane biex jilqgħu lil Fulham li huma wkoll huma virtwalment salvi minn kull periklu.
