Mil-lum sa nhar il-Ħamis se tintlagħab il-15-il ġurnata tal-Premier League Ingliż biċ-champions Manchester City ikollhom impenn diffiċli meta jaffrontaw lil Aston Villa, f’Villa Park.
Il-Villa jinsabu punt wara s-City u għaldaqstant meta se jkunu home jafu jieħdu xi ħaġa mil-logħba.
Il-leaders Arsenal ikunu fl-azzjoni llum meta jmorru għand Luton Town li minkejja li żammew lil Liverpool draw f’Kenilworth Road, ma jidhirx li għandhom jinkwetaw lill-Gunners li rebħu l-aħħar tliet logħbiet tagħhom.
Il-logħba l-oħra tal-lum tara lil Wolves jilqgħu lil Burnley li ġejjin minn riżultati kuntrastużi, b’tal-ewwel minn telfa kontra Arsenal u l-Clarets minn rebħa kbira 5-0 għand Sheffield United.
Għada se jsiru sitt logħbiet oħra bl-10 timijiet li lagħbu l-Ħadd ikunu kollha nvoluti fejn Chelsea jkunu f’Old Trafford kontra Manchester United f’dik li hija logħba oħra mistennija. Ir-Red Devils ġejjin mit-telfa 1-0 għand Newcastle waqt li Chelsea għelbu lil Brighton 3-2 fi Stamford Bridge.
Brighton se jilqgħu lil Brentford meta kisbu rebħa biss mill-aħħar sitt logħbiet waqt li l-Bees marru aħjar minnhom b’erba’ rebħiet u żewġ telfiet.
Żewġ timijiet li l-Ħadd temmew fi draws, Crystal Palace u Bournemouth, se jiltaqgħu f’Selhurst Park biċ-Cherries imorru aħjar fl-aħħar sitt ħarġiet.
Fulham se jilqgħu lil Nottm Forest fi Craven Cottage biż-żewġ timijiet jiksbu rebħa kull wieħed mill-aħħar sitt logħbiet bil-club ta’ Londra joffri logħba ferm impenjattiva kontra Liverpool waqt li l-Forest sfaw megħluba minn Everton.
It-team tal-qiegħ, Sheffield United, se jilqa’ lil Liverpool li ġejjin minn rebħa drammatika kontra Fulham bl-erba’ goals tagħhom ikunu verament tal-istampi meta ġew minn xuttijiet sublimi minn barra l-kaxxa.
Il-Ħamis isiru l-aħħar żewġ logħbiet fejn l-ewwel jibdew Everton u Newcastle li t-tnejn ġejjin minn rebħa u wara jkun hemm id-derby ta’ Londra bejn Tottenham u West Ham fejn tal-ewwel qed igawdu sitt punti vantaġġ fuq il-Hammers.
PROGRAMM KOLLU
Illum
Wolves v Burnley 8.30
Luton v Arsenal 9.15
Għada
Sheffield U. v Liverpool 8.30
Brighton v Brentford 8.30
Fulham v Nottm F. 8.30
C. Palace v Bournemouth 8.30
Aston Villa v Man City 9.15
Man Utd v Chelsea 9.15
Il-Ħamis
Everton v Newcastle 8.30
Tottenham v West Ham 9.15
