Ħafna mid-drabi r-rutina u l-ħajja mgħaġġla ta’ kuljum tagħna twassalna biex ma napprezzawx kemm suppost dak li għandna, is-sabiħ ta’ madwarna, u s-saħħa tagħna, għax tant inkunu aljenati li qajla naħsbu li fi ftit minuti jista’ jiġri xi ħaġa u teqleb ħajjitna ta’ taħt fuq, saħansitra li jkollok tieqaf mix-xogħol u dan jaffettwa mhux biss lilek imma wkoll lill-membri tal-familja tiegħek.
Dan għadda minnu Shawn Mifsud, li meta tkellimna miegħu u tlabna ftit informazzjoni fuq it-tfulija tiegħu qalilna li huwa qatta’ t-tfulija tiegħu f’Birkirkara, raħal twelidu, u meta kiber u żżewweġ mar joqgħod Santa Venera, u issa huwa “missier ta’ żewġt itfal bniet, waħda ta’ ħames snin u oħra ta’ sentejn. Inħobb ħafna l-isports, kwalunkwè sports li jiġi, u nħobb insegwi fuq kollox u fuq dak li qed jiġri.”
Shawn kif spjega hu kellu ħajja normali u sabiħa mdawwar bil-familja meta ġie milqut ħabta u sabta minn din il-kundizzjoni meta kif spjega hu wara li qabdu wġigħ ta’ ras, “beda minn dahri, kelli wkoll flissjoni, mort il-festa ta’ Santa Liena f’Awwissu, u minn hemmhekk, naħseb il-marda qaltli hawn irridek, għax ma flaħtx iktar, deni tiela’ u nieżel, tant li għedt lill-mara ġġibli ambulanza.
Minn hemmhekk dħalt l-Isptar, bdew ġejjin tabib wara ieħor, daħlu xi ħames tobba, u kif rajt ħames tobba mill-ewwel għedt li l-affarijiet mhux qegħdin sewwa, għax jiena qatt ma kont rajt ħames tobba quddiemi. Wara kienet ġiet infermiera li qalet li jiena kont f’qagħda kritika u mill-ewwel daħluni fil-kura intensiva. Kienu raqduni u għamilt ġimagħtejn f’koma, bħal rieqed. Kif qomt imbagħad ġew jispjegawli li ser ikollhom jaqtgħu l-idejn u s-saqajn għax id-demm ma kienx qed jiċċirkola sew.”
Din il-kundizzjoni kif spjega tajjeb Shawn ħakmet idejh u saqajh it-tnejn u li għalih beda bħal vjaġġ ġdid ieħor. Iżda wieħed ta’ min jammira din il-pożittività kollha li skont hu, din ġejja għax “għalkemm ikolli mumenti ta’ dwejjaq, tant li kelli nfittex l-għajnuna u sibt ħafna għajnuna u għenuni mentalment, għax imbagħad jiena kont il-ħin kollu l-isptar Karin Grech, bdejt nimmissja ħafna lit-tfal, u naturalment ma bqajtx normali, iżda jien minn dejjem kont bniedem kuraġġuż, bniedem li nilqa’ l-isfidi, anke l-fatt li jien fl-armata u dejjem jitfgħulek l-isfidi quddiemek, allura preparat. Komplejt, u meta ma kienx jirnexxieli dejjem kont nibqa’ nipprova.”
Huwa jgħid kif “esperjenza bħal din ħadd ma jkun qed jistennieha, u nispera li ma jgħaddi ħadd minna, għax għalkemm kulħadd għandu l-istorja tiegħu, u għamilt 37 sena ngħix ħajja normali, imbagħad f’sekondi, u wara ftit sigħat niġi f’din is-sitwazzjoni, jiġi t-tabib fuqek u jgħidlek, ser ikollna naqtgħu ż-żewġ idejn u ż-żewġ saqajn, inkella se tmut f’temp ta’ jumejn. Jiena kont stennejt li ser ikun hemm bżonn ta’ intervent għax meta rajt saqajja u jdejja litteralment kienu ta’ monstru, tant li kont ngħidilhom jgħattuhomli għax kont narahom wisq koroh.”
Shawn issa qed jitħarreġ fuq saqajn bioniċi ġodda għax kif qalilna huwa “qed nippjana biex għas-sajf nibda nimxi. Għandi saqajn li qed jinżammu Karin Grech, u nsellem u nirringrazzja lill-outpatients tal-RAU, kemm lil Simon u anke lil Marcette, iż-żewġ fiżjoterapista tiegħi li huma verament mill-aħjar, u jridu jarawni nimxi, u ma tantx iħalluni neħlisha ħafif, għax ġieli nkun għajjien imma jibqgħu jinsistu.”
Shawn jiddeskrivi din l-esperjenza tas-saqajn bioniċi li mhi faċli xejn għax ikollu jmur jitħarreġ kuljum u “allura titlob ħafna xogħol u ħafna ħin għax kien hemm min qalli wkoll li biex titħarreġ tuża l-idejn huwa ħafna itqal milli titgħallem tuża dawn is-saqajn, imma fl-opinjoni tiegħi dan huwa bil-kontra, għax jien l-idejn issa ksibt l-esperjenza u nibqa’ nitħarreġ, imma s-saqajn qed narahom diffiċli, għax qisu bħal tifel żgħir, tarbija li qed titgħallem timxi mill-ġdid, trid titgħallem iżżomm il-bilanċ, li titgħallem iżżomm f’post wieħed, terġà ttella’ l-muskoli, hemm ħafna fatturi li trid titgħallimhom” Imma dejjem iżomm l-għan tiegħu f’moħħu u jibqa’ jħares ’il quddiem, għax l-għan tiegħu hu li issa fis-sajf li ġej, sejjer vaganza f’Lulju u għalhekk jixtieq li sa dak iż-żmien ikun beda jimxi. Għalhekk skont Shawn “trid titla’ tarġa tarġa”.
Din il-pożittività ta’ Shawn żgur li għandna ħafna x’nitgħallmu minnha, anke għalina li aħna wkoll forsi naqtgħu qalbna mill-ħajja kultant, narawha iebsa, ma narawx triq oħra aħjar, u għalhekk xtaqna li jwassal messaġġ finali, u qalilna li “jekk taqa’ tmien darbiet, tqum disgħa, jekk hemm sfida prova idħlilha xorta, agħmilha, u dejjem tgħallem minn dawk l-iżbalji li tkun għamilt. Trid tibqa’ tħares ’il quddiem, u ma tridx tieqaf. Fl-aħħar mill-aħħar hemm dawk madwarek li jissapportjawk, bħall-familja u ħbieb li trid tagħti sodisfazzjon lilhom biex inti tibqa’ għaddej, għalkemm mhix faċli, imma jekk tibqa’ tipprova u tagħmel dawn l-affarijiet, dawn ser ikunu kburin bik u anke inti tkun kburi bik innifsek ukoll”.
Għalhekk, filwaqt li nifhmu li esperjenzi bħal dawn jgħinuna biex napprezzaw aktar il-ħajja u dak li għandna, u nifhmu wkoll kemm għandna x’nitgħallmu minn persuni bħal Shawn, nawgurawlu biex jibqa’ b’dan il-kuraġġ, li huwa żgur ta’ ispirazzjoni għal ħafna minna, jibqa’ wkoll iħares ’il quddiem u jilħaq l-għan li qed jaħdem għalih sabiex jerġa’ jikseb l-indipendenza tiegħu meta mill-ġdid jerġa’ jibda jimxi u wkoll jibda jagħmel ħafna mill-affarijiet li kien jagħmel qabel u li bħalissa limitat minħabba din il-kundizzjoni.