L-awtoritajiet ġewwa l-Ghana qegħdin jinvestigaw il-każ ta’ raġel li safa maqtul minn iljun hekk kif kif tal-ewwel daħal f’żona magħluqa ġewwa zoo fil-kapitali Accra. Ir-raġel, li kien deskritt bħala ta’ mezz’età, miet kawża tal-ġrieħi li sofra. L-awtoritajiet responsabbli minn dan iz-zoo qed jgħidu li dan ir-raġel aktarx ipprova jisraq żewġt ifrieħ ta’ ljuni li huma rari ħafna, liema frieħ qegħdin ikunu ta’ attrazzjoni kbira f’dan iz-zoo partikolari. Dawn il-frieħ twieldu f’Novembru li għadda.
Min-naħa tagħhom, il-pulizija fetħu investigazzjoni biex ikun magħruf eżatt il-motiv ta’ dan ir-raġel u anke iċ-ċirkostanzi ta’ dan l-attakk. L-uffiċjali qalu li biex daħal f’din iż-żona, dan ir-raġel kellu l-ewwel jitla’ ma’ fence li kien għoli għaxar piedi, imbagħad ma’ ieħor li hu għoli għoxrin pied.
Dan ir-raġel jidher li daħal f’parti li fiha kien hemm iljun, iljuna u l-frieħ tagħhom. Fid-dawl ta’ dan, il-Viċi Ministru għall-Artijiet u r-Riżorsi Naturali Benito Owusu Bio qal li meta l-iljuni jkollhom il-frieħ dawn ikunu fuq allert u għalhekk kulmin jersaq ħdejhom irid joqgħod attent hekk kif dawn jaħsbu li se jitteħdulhom. Bio ħeġġeġ lill-pubbliku biex jevita li jagħmel affarijiet bħal dawn.
