Real Madrid qed jagħmlu minn kollox biex iżommu lil Karim Benzema u Ferland Mendy ‘fl-aqwa forma possibli qabel l-ewwel leg tal-aħħar 16 taċ-Champions League tal-ġimgħa d-dieħla kontra Paris Saint-Germain.
Benzema tilef il-konfront kontra Granada mil-La Liga fis-6 ta’ Frar minħabba problema fil-koxxa, filwaqt li Mendy kien assenti minħabba kwistjoni muskolari.
Benzema u Mendy għadhom jaħdmu ‘l bogħod mill-grupp ewlieni, u għalhekk huma dubjużi għall-partita tal-kampjonat ta’ dan tmiem il-ġimgħa kontra Villarreal.
Huma jistgħu jirritornaw għat-taħriġ tal-ewwel team qabel tmiem il-ġimgħa, iżda l-Los Blancos mhux se jieħdu ċans fejn jidħol il-fitness tagħhom.
Minħabba f’hekk, qed jiġi allegat li ż-żewġ players jistgħu jerġgħu jkunu assenti kontra Villarreal is-Sibt bil-ħsieb li jagħmlu r-ritorn tagħhom kontra PSG fiċ-Champions League fil-15 ta’ Frar.
Benzema skorja 24 goal u rreġistra disa’ assists fi 28 dehra għal-Los Blancos dan l-istaġun, filwaqt li Mendy skorja goal u pprovda żewġ assists f’21 ħarġa għat-team ta’ Carlo Ancelotti.
