Meta saret ir-Regatta ta’ Jum il-Ħelsien, l-Isla rebħu Kategorija Open u Bormla Kategorija B.
Filwaqt li s-Sengleani temmew il-monopolju tal- Bormliżi fl-aqwa kategorija u rebħuha għall-11-il darba, l-istess Bormliżi rebħu Kategorija B għat-13-il darba u għal rekord ta’ ħames darbiet konsekuttivi.
KATEGORIJA OPEN
L-Isla rebħu l-ewwel tiġrija, dik tad-Dgħajjes tal-Midalji wara li ż-żewġ favoriti, Birgu u Bormla, ġew skwalifikati meta daħlu f’xulxin f’nofs il-korsa.
U minħabba l-fatt li ħadu sehem erba’ dgħajjes biss, Marsa temmew fit-tieni post.
L-ekwipaġġ tal-Isla kien kompost minn Redeemer Rapa, Glenn Zammit, Russell Bugeja u Andre Gauci.
It-tiġrija tal-Frejgatini ntrebħet mill-Isla li ddominawha għal kollox bil-Marsa u l-Kalkara jidħlu fit-tieni u t-tielet postijiet rispettivament filwaqt li Bormla sfaw skwalifikati.
L-ewkipaġġ rebbieħ kien kompost minn Davison Micallef u Clyde Mizzi, bit- tmuniera tkun Melvana Micallef.
Għall-20 darba nfila, il- koppja Dennis Thornton u Clive Casha rebħu t-tiġrija tal-Pass ta’ Bi Tnejn biex ikkonfermaw id-dominanza tagħhom fid-dgħajsa ta’ Bormla meta rreġistraw ħin ta’ 5’58”, li kienu segwiti mill- Birgu u mill-Isla.
Bir-rebħ tal-Kajjiki, l-Isla ġew dikjarati rebbieħa tax-Shield meta tellgħu total ta’ 50 punt u ma setgħux jintlaħqu minn Bormla li kellhom 24 punt.
Il-qaddiefa rebbieħa kienu Davison Micallef u Andre Gauci li temmew quddiem il-Birgu u Bormla rispettivament.
L-Isla rebħu wkoll it-tiġrija tal-Pass ta’ bl-Erbgħa meta Redeemer Rapa, Glenn Zammit, Russell Bugeja u Andre Gauci, daħlu xxamplati fl-ewwel post quddiem Bormla u Marsa.
KATEGORIJA B
L-ewwel tiġrija kienet dik tal-Pass ta’ Bi Tnejn li ħadet kemmxejn fit-tul minħabba false start, fejn il-Birgu sfaw skwalifikati minħabba li daħlu fid-dgħajsa tal-Isla.
Din intrebħet mill-Isla f’ħin ta’ 5’45”, mill-qaddiefa Marlon Cutajar u Kevin Camilleri, segwiti mill-Kalkara u Bormla.
It-team tal-Kalkara, ifformat minn Jean Claude Cassar u Joseph Pace, rebaħ it-tiġrija tal-Kajjiki, f’ħin ta’ 6’11”, segwit minn l-Isla u Birżebbuġa li daħlu ras imb’ras.
Bormla rebħu it-tiġrija tad-Dgħajjes tal-Midalji, f’ħin ta’ 4’41” minkejja li f’nofs il-korsa ġew imwaqqfa minn Birżebbuġa li sfaw skwalifikati. Huma kienu segwiti mill-Karkara u mill- Isla.
Il-protagonisti kienu Elton Azzopardi, Charvon Gatt, Clyde Debattista u Yannick Pace.
Birżebbuġa rreġistraw l-ewwel rebħa meta daħlu fl-ewwel post fit-tiġrija tal- Frejgatini.
Huma kienu fit-tielet post iżda mal-Ponta tal-Isla bdew jattakkaw biex għelbu l-isfida tal-Isla u tal-Kalkara meta kisbu ħin ta’ 7”17.
L-ekwipaġġ kien kompost minn Brolin Genovese u Mel Magro, b’Kayzil Curmi jkun it-tmunier.
Bormla rebħu l-aħħar tiġrija, dik tal-Pass ta’ bl-Erbgħa biex rebħu x-Shield, bit-team ikun kompost minn Elton Azzopardi, Charvon Gatt, Clyde Debattista u Ynnick Pace.
Fit-tieni post spiċċaw Birgu segwiti mill-Kalkara.
Frejgatini tan-Nisa
Qabel dan il-programm saret tiġrijia tal-Frejgatini tan-Nisa li ntrebħet minn dik tal-Birgu li temmet f’ħin ta’ 7’10” … fejn Shazel Grima u Glynis Mizzi reġgħu wrew is-supremazija tagħhom, bit-tmunier ikun Ishmael Frendo.
Fit-tieni post spiċċaw Marsa segwiti minn Bormla.
Klassifika Finali Open: 74 – ISLA; 40 – Bormla; 28 – Marsa; 20 – Birgu; 4 – Kalkara
Klassifika Finali B: 50 – BORMLA; 48 – Kalkara; 42 – Isla; 16 – Birgu u Birżebbuġa
