Ronald Koeman żvela li mhux ċert jekk hux se jibqa’ coach ta’ Barcelona, wara t-telfa diżappuntanti tagħhom ta’ 3-0 kontra Benfica fiċ-Champions League nhar l-Erbgħa filgħaxija.
Il-club Katalan tilef l-ewwel żewġ logħbiet fi Grupp E, filwaqt li Koeman naqas ukoll li jirbaħ fi tliet okkażjonijiet fil-La Liga s’issa dan l-istaġun, meta ġie draw kontra Athletic Bilbao, Granada u Cadiz.
Ġie rrappurtat li l-mandat tal-Koeman fil-Camp Nou huwa wieħed ferm inċert, madankollu l-Olandiż jemmen li l-bord għandu jagħti lilu nnifsu u lit-team ħin biex ibiddlu l-fortuni tagħhom.
“Ma nista’ ngħid xejn dwar il-futur tiegħi għax ma nafx kif jaħseb il-club f’dak is-sens. Mhuwiex f’idejja u se nkunu qed naraw x’se jkun qed iġib miegħu l-futur,” qal Koeman.
“Naħseb li, għal kwalunkwe coach, huwa dejjem diffiċli li jitlef żewġ logħbiet konsekuttivi taċ-Champions League. Int trid tkun realistiku u tkun taf li hija sitwazzjoni delikata. Nipprova nagħmel dan perfettament. Int trid tipprova tagħti lit-team il-ħin u tibdel l-affarijiet għall-aħjar. “
“Jien ser nagħti l-opinjoni tiegħi biss dwar it-team, dwar il-plejers tiegħi. Inħossni appoġġat mill-players tiegħi; mill-bqija, ma nafx.”
Il-leġġenda ta’ Barcelona Xavi kif ukoll il-manager tal-Belġju Roberto Martinez huma żewġ kandidati li qed jiġu kkunsidrati mill-ġerarkija tal-klabb biex jieħdu r-riedni tal-club Katalan.
