Roxanne Fabri … eżempju ta’ determinazzjoni, dedikazzjoni u altruwiżmu – Rebbieħa tal-Konkors Mrs Malta 2025 

Roxanne Fabri, ta’ 36 sena u omm ta’ żewġt itfal, ġiet inkurunata bħala Mrs Malta 2025. Is-suċċess tagħha wasal waqt serata spettakolari organizzata minn Gaffiero Productions, li fiha ħadu sehem 58 kontestant u kontestanta. Matul l-istess serata ġew ukoll mogħtija erba’ titli prestiġjużi oħra.
 
Fit-tieni post tal-konkors Mrs Malta 2025 ikklassifikat Kerstin Abrook min-Naxxar, filwaqt li t-tielet post mar għand Rodianne Spiteri minn Ħaż-Żebbuġ.
 
Is-serata rat ukoll ir-rebħa ta’ Hannah Carter min-Naxxar bit-titlu ta’ Miss Maltese Beauty Teen. Fit-tieni post ġiet Kurtney Bonello Henwood li rrappreżentat lill-Isla, u fit-tielet post Zaida Azzopardi mir-Rabat. Għat-titlu ta’ Miss Maltese Beauty, l-ewwel post intrebħet minn Martha Urpani tan-Naxxar, segwita minn Nikole Buhagiar tal-Floriana fit-tieni post u Ruslana Cutajar mill-Belt Valletta fit-tielet.
 
L-avveniment, imtella’ mill-producer Ivan Gaffiero, kellu wkoll dimensjoni ta’ solidarjetà. F’din l-okkażjoni, inġabret is-somma sabiħa ta’ €11,455 u ngħatat lil Hospice Malta. Din is-somma kienet frott diversi attivitajiet ta’ karità li ġew organizzati mill-kontestanti stess fil-ġimgħat ta’ qabel.
 
Is-Sur Gaffiero saħaq li fil-konkorsi tiegħu mhux biss jagħti importanza lis-sbuħija esterna, iżda wkoll lill-kwalitajiet umani tal-kontestanti. Huwa stqarr li l-valuri ta’ qalb tajba u sens ta’ solidarjetà huma kruċjali, u għalhekk id-donazzjoni lil Hospice Malta se tkompli tkun ta’ ġid kbir għall-pazjenti kif ukoll għall-familji tagħhom.
 
U Mrs Malta 2025 Roxanne Fabri saret isem magħruf u rispettat fid-dinja tal-immudellar u tas-sbuħija f’Malta. Riċentement hija rebħet Mrs Malta, waqt li kienet qiegħda tippreżenta l-lokalità ta’ Ħal Qormi, u dan it-titlu prestigjuż jfisser ħafna għaliha. Hekk kif saret taf li kienet ir-rebbieħa ta’ din il-kompetizzjoni, Roxanne qalet fuq Facebook li kienet lejla speċjali u ferm sodisfatta għax wara ħafna preparamenti ħadet dak li ħadmet għalih.
 
“Kelli ħafna kompetizzjonijiet oħra fil-passat, iżda din tal-lejla kienet ferm speċjali.” qaltilna Roxanne f’intervista li tat lil din il-gazzetta. “Grazzi mill-qalb lil Direttur Ivan Gaffiero, Tiziana Gaffiero, u lil Sue Rossi li kienet il-mentor tiegħi,” qalet.
 
Il-karriera ta’ Roxanne Fabri ma bdietx bil-konkors tas-sbuħija biss. L-imħabba tagħha għall-immudellar bdiet 11-il sena ilu, meta xtaqet tagħmel xi ħaġa differenti għaliha personali u biex tiżviluppa ħiliet tagħha. Minn dakinhar, Roxanne ma waqfitx; minkejja li hija omm ta’ żewġt itfal, ta’ 15 u 8 snin rispettivament, kompliet tinvesti ħin u dedikazzjoni fl-immudellar u fin-negozju tagħha. “Trid tagħmel skeda ta’ kollox, bl-Ingliż jgħidulha time management, ħin it-tfal irid ikun hemm, l-immudellar u tlaħħaq ma kollox,” qalet, u dan juri kemm hija organizzata u determinata bħala persuna.
 
Barra minn hekk, Roxanne hija impenjata fil-karità u l-attivitajiet soċjali. Hija għenet lil xi organizzazzjonijiet fosthom Hospice Malta u lil Puttinu Cares, li bla dubju jagħtu appoġġ lill-komunità b’mod dirett u sinjifikanti. Roxanne spjegat li l-għan dejjem kien li dan il-ġid jingħata lura lill-komunità. F’okkażjoni partikolari, ġie organizzat avveniment ta’ fund-raising fil-Kazin Pinto San Sebastjan, li sar possibbli grazzi għall-ħbieb tagħha Mark u Fabrizia u l-istaff tagħhom.
 
Il-lejla kienet mimlija atmosfera sabiħa u mużika mill-kantant lokali Fabrizio Faniello, u l-ikel kien eċċellenti. Hija żiedet li t-tim tagħha fis-salon tagħha, Roxanne Fabri Beauty Salon, iddedika jumejn sħaħ mill-profitti tas-salon għal Hospice Malta, b’għajnuna minn Forever, u hija kburija b’dak kollu li għamlu l-impjegati tagħha biex jgħinu. “Dan huwa biss il-bidu — aħna impenjati li nkomplu nagħmlu dan fil-futur, għax tingħata lura hija parti minn min aħna,” qalet Roxanne.
 
Fil-qasam tan-negozju, Roxanne kienet ukoll rikonoxxuta bħala Beauty Specialist, PMU Artist, u rebħet Best Beauty Salon of the Year 2025. Dawn is-suċċessi juru kemm hija dedikata għall-professjoni tagħha u kemm tħobb li tipprovdi servizz ta’ kwalità lill-klijenti tagħha. Barra minn hekk, hija ilha taħdem ma’ Pearl Nail Master, u dan jikkonferma li hija vera esperta fl-industrija tal-beauty u wellness.
 
Roxanne tkellmet ukoll dwar il-valuri tagħha u dwar il-messaġġ li trid tqassam lill-oħrajn. Meta mistoqsija dwar x’tfisser għaliha rebħa, hija qalet: “Ħolma li saret realtà, wara erba’ darbiet.” Hija enfasizzat li l-persistenza, il-paċenzja u d-dedikazzjoni huma ċ-ċwievet biex wieħed jasal fejn jixtieq fil-ħajja.
 
Fil-qasam personali, Roxanne tħeġġeġ lil oħrajn biex jagħmlu ħilithom u jsegwu l-passjoni tagħhom. “Ma tridu taqtgħu qalbkom qatt. Sibu l-ħin tagħkom infuskom, kunu kuraġġużi u kunu intom infuskom,” hija qalet. Hija tinnota li s-sbuħija vera mhix biss dik ta’ barra imma dik interna, li tinħoloq mill-karattru, il-grazzja u l-kunfidenza tal-persuna.
 
“L-eleganza mhux biss dak li int tilbes u kif tidher, iżda wkoll kif jirnexxielek tkun b’saħħtek fil-karattru u kunfidenti bik innifsek, ” qalet.
 
Roxanne qed tħares ‘il quddiem b’ottimiżmu għall-futur tagħha. Hija trid tibqa’ involuta fl-immudellar, tkompli ttejjeb in-negozju tagħha u tkompli taħdem spalla ma’ spalla ma’ Ivan Gaffiero. Hija qalet li t-tfal tagħha jibqgħu jkollhom rwol importanti fil-ħajja tagħha, u hija determinata li tipprovdi eżempju b’ħajjitha kemm fil-karriera kif ukoll fil-valuri personali.
 
Fl-aħħar iżda mhux l-inqas, Roxanne Fabri hija eżempju ta’ determinazzjoni, dedikazzjoni u altruwiżmu. Il-karriera tagħha fl-immudellar, is-suċċessi fin-negozju tal-isbuħija, u l-impenji tagħha fil-karità juru kif persuna tista’ tgħaqqad il-professjonali u l-personali b’mod armonjuż. Il-messaġġ tagħha lill-oħrajn huwa ċar: tinvesti f’ħajjtek, issegwi l-ħolm tiegħek, u dejjem stinka biex tingħata lura lill-komunità.