Fl-aħħar sigħat minn fuq il-bastiment ta’ salvataġġ Alan Kurdi ġew evakwati tmien persuni fosthom tfal. Dawn kienu salvati bejn is-Sibt u l-Ħadd li għadda. B’kollox ġew salvati 133 immigranti fi tlett okkażjonijiet separati fejn 62 minn dawk salvati huma tfal.
Kai Echelmeyer, li hu osservatur għad-drittijiet umani abbord l-Alan Kurdi qal li fl-ewwel salvataġġ kienu salvati 90 persuna, fit-tieni wieħed 24 persuna u fit-tielet 19-il persuna.”
Hu ddikjara li “meta wieħed jara kemm hi vasta din iż-żona, wieħed jista’ jgħid li kienu fortuna li dawn ġew salvati. Wieħed jista’ jimmaġina kemm dgħajjes għebu u ħadd ma sema’ bihom”.
Jidher li Sea Eye qed tinsisti li dawn l-immigranti jiddaħħlu l-Italja. Gorden Isler, li hu ċ-Ċerpersin ta’ Sea Watch, qal li meta għamlu kuntatt mal-awtoritajiet Taljani, dawn qalulhom biex jagħmluj kuntatt mal-awtoritajiet ta’ salvataġġ Ġermaniżi minħabba li l-bastiment kien reġistrat taħt il-bandiera marittima Ġermaniża.
Jidher li l-awtoritajiet Taljani qalu lil Sea Watch li is-salvataġġ ma sarx f’ibħra li jaqgħu taħt ir-responsabbilità ta’ salvataġġ Taljana u għalhekk huma kellhom jikkuntattjaw lill-awtoritajiet Ġermaniżi.
Apparti 62 tfal, abbord il-bastiment hemm għadd ta’ familji u nisa tqal. Wieħed mit-tfal għadu tarbija u għandu biss ħamess xhur.
