Minn mindu tnediet il-kampanja tat-tiswija tal-qtates tat-triq, bl-għajnuna ta’ koordinatur, tal-veterinarji u ankè l-istudenti li qegħdin jassistu f’din il-kampanja, ġew salvati 400 qattus minn każi ta’ mard li jistgħu jkunu suġġetti minħabba l-fatt li dawn jgħixu fit-toroq.
Dan qalitu s-Segretarju Parlamentari għas-Sajd, l-Akwakultura u d-Drittijiet tal-Annimali, Alicia Bugeja Said f’kumment li tat lil dan is-sit
Hija semmiet kif f’Ġunju tnediet il-kampanja nazzjonali għat-tiswija u l-iċċippjar tal-qtates fit-triq fejn b’investiment ta’ €200,000 fis-sena, se jiġu indirizzati mal-5,000 qattus fis-sena.
Bugeja Said saħqet li l-klinika qiegħda topera darbtejn fil-ġimgħa, it-Tlieta u l-Ħamis u sa issa qed jiġu msewwija madwar 25 qattus fil-ġurnata bejn żewġ veterinarji. Żiedet tgħid li dan jitqies bħala numru ġust sabiex kull qattus ikun ħa l-attenzjoni meħtieġa sabiex il-proċedura ssir bl-aħjar mod possibli.
Żiedet tgħid; “Minkejja kollox, xorta għadna qegħdin nesploraw u naħdmu biex intejbu din il-kampanja ankè fid-dawl tal-ġarr tal-qtates minn lokalitajiet differenti. Nieħu din l-okkażjoni sabiex nirringrazzja l-voluntiera varji li qegħdin impenjati f’din il-kampanja”.
Permezz ta’ din il-kampanja qiegħda titwettaq miżura oħra tal-baġit għas-sena 2024. Sa issa ġew implimentati diversi inizjattivi. Fost dawn hemm l-iskema tal-vawċers li qed issir b’koperazzjoni mal-feeders u mal-voluntiera fejn din is-sena diġà ġew imsewwija ’l fuq minn elf qattus.
