San Ġiljan ASC ħabbru l-akkwist permanenti ta’ Chloe Amato, u b’hekk assiguraw is-servizzi ta’ waħda mill-aktar talenti żgħażagħ promettenti f’Malta bħala parti mill-pjanijiet fit-tul tal-klabb.
Imwielda fl-2009, Chloe diġà ħolqot preżenza impressjonanti fix-xena tal-waterpolo Malti.
Bħala player versatili u b’talent kbir li kapaċi tilgħab f’diversi rwoli, hija rrappreżentat lit-Tim Nazzjonali Malti tal-kbar, filwaqt li ngħatat ukoll ir-responsabbiltà li tmexxi bħala kaptan lit-timijiet nazzjonali ta’ taħt it-18-il sena (U18) u ta’ taħt l-20 sena (U20).
Il-progress tagħha kompla wkoll permezz tal-Malta College of Sports (MCS), fejn tħarrġet taħt il-gwida tal-kowċ rinomat Milan Ćirović, fatt li kompla jsaħħaħ l-iżvilupp tagħha kemm mil-lat tekniku kif ukoll minn dak tattiku.
Minkejja l-età żgħira tagħha, Chloe diġà wriet ħila u maturità konsiderevoli f’diversi livelli tal-logħba. Fi stqarrija, San Ġiljan ASC qalu li jinsabu ħerqana biex jipprovdu lil Chloe l-ambjent, l-opportunitajiet u l-appoġġ meħtieġa biex tkompli tiżviluppa l-logħba tagħha u tilħaq il-potenzjal sħiħ tagħha.
