Tliet żgħażagħ Spanjoli ta’ 23 sena ġew arrestati wara li nstabu fil-pussess ta’ sustanzi suspettati droga ecstasy, raża tal-cannabis u ħaxixa tal-cannabis.
Huma ġew arrestati wara li l-Pulizija tad-Distrett ta’ San Ġiljan marru mill-ewwel fi blokka ta’ appartamenti fuq rapport ta’ storbju.
Kmieni dalgħodu, għall-ħabta tal-04.15 a.m., il-Pulizija waslulha rapporti mill-pubbliku ta’ storbju li kien ġej minn appartament fi Triq il-Mensija, San Ġiljan.
X’ħin waslu fuq il-post, il-Pulizija taw istruzzjoni lill-persuni li kienu fl-appartament biex jinżlu isfel, iżda dawn irrifjutaw. B’assistenza ta’ xi ġirien, il-Pulizija daħlu fil-binja u meta telgħu fit-tieni sular, daħlu flappartament u sabu lit-tliet żagħżagħ.
Minn tfittxija li saret fl-appartament instabu sustanzi suspettati droga.
It-tliet Spanjoli kienu arrestati u ttieħdu fil-Kwartieri Ġenerali tal-Pulizija.
L-investigazzjonijiet mill-Pulizija mid-Distrett ta’ San Ġiljan dwar dan il-każ għadhom għaddejjin.
