Eġizzjan ta’ 35 sena ntbagħat sena ħabs wara li ammetta għal akkużi dwar traffikar ta’ immigranti.
Mohamed Ahmed Elgamal kien tressaq il-Qorti mixli li fl-14 ta’ Settembru li għadda, għen jew assista sabiex jidħlu l-immigranti f’pajjiżna b’mod illegali. Huwa kien mixli wkoll li saq bastiment mingħajr liċenzja.
Elgamal kien għall-ewwel wieġeb mhux ħati imma mbagħad għażel li jammetti għall-akkużi miġjuba kontra tiegħu, bil-Qorti twissieh dwar il-konsegwenzi ta’ din l-ammissjoni. Huwa iżda kkonferma li kien ħati.
Qabel ġiet biex tagħti l-piena, il-Qorti preseduta mill-Maġistrat Donatella Frendo Dimech, ikkunsidrat l-ammissjoni tiegħu u l-fatt li huwa wera bil-fatti li ried jikkopera mal-awtoritajiet investigattivi, fejn wera li lest jikkonferma x-xhieda tiegħu meta l-proċeduri fil-konfront tiegħu jiġu konklużi.
Il-Qorti qieset ukoll il-fedina penali netta tiegħu u ċ-ċirkostanzi l-oħra tal-każ, fosthom li biex tintrebaħ il-ġlieda kontra dan il-fenomenu li jisfrutta l-miżerja ta’ persuni kostretti li jfittxu ħajja aħjar, hu essenzjali li persuni li kienu ko-parteċipi jew involuti f’tali għemil, kemm-il darba ma jkunux jew jibqgħu ko-imputati, jagħtu x-xhieda tagħhom.
L-għadd ta’ persuni megħjuna u assistiti biex jiddaħħlu Malta wkoll ingħata piż fil-konsiderazzjonijiet tal-Qorti dwar il-piena.
Kien għalhekk li nstab ħati tal-imsemmija akkużi u kien ikkundannat għal perjodu ta’ sena priġunerija flimkien ma’ multa ta’ €500.
