Raġel ta’ 47 sena residenti Raħal Ġdid kien ikkundannat sena ħabs sospiżi għal sentejn wara li ammetta li segwa mara diversi drabi minkejja l-ordni li kellu biex ma jagħmilx dan.
Huwa wieġeb ħati għall-akkużi li kiser xi projbizzjoni jew restrizzjoni imposta fuqu b’ordni tal-Qorti tal-Maġistrati u li wettaq reat waqt perjodu operattiv ta’ liberazzjoni kondizzjonata.
Il-Prosekuzzjoni spjegat fil-Qorti ċ-ċirkostanzi li wasslu għall-arrest tal-imputat. Intqal li f’April li għadda kien tressaq fil-Qorti fuq segwiment u kien instab ħati u kien ikkundannat multa u ngħata l-libertà kkundizzjonata.
Fl-10 ta’ Lulju, il-vittma kienet għamlet rapport ieħor fil-konfront tal-imputat fejn allegat li għal diversi drabi kien qed isegwiha. Surġent bagħat għalih fl-Għassa ta’ Raħal Ġdid u widdbu biex ma jibqax jagħmel dan iżda għal xi raġuni l-għada stess l-imputat reġa’ ntlemaħ fl-akwati tad-dar tagħha.
Kien għalhekk li l-Ispettur Karen Cassar talbet li jinħareġ mandat u ġie arrestat is-Sibt li għadda. Huwa tressaq fil-Qorti l-Ħadd fejn ammetta l-akkużi kollha miġjuba fil-konfront tiegħu.
Filwaqt li sabitu ħati, il-Qorti kkundannatu sentenza sospiża filwaqt li ħarġet ordni ta’ trażżin għall-benefiċċju tal-vittma għal żmien sentejn. Il-Qorti wissiet lill-ħati biex ma jersaq lejn din il-mara bl-ebda mod. “Żomm ruħek ’il bogħod mill-inkwiet,” qallu l-Maġistrat Noel Bartolo.
Il-Prosekuzzjoni tmexxiet mill-Ispetturi Gabriel Kitcher u Karen Cassar.