Titjira minn Malta lejn Katanja kellha ddur lura lejn Malta wara li passiġġiera rrifjutat li tilbes il-maskra, b’dan iwassal għall-arrest tagħha.
Il-Qorti semgħet kif Freya Angeolova Moutafova, Taljana ta’ 24 sena residenti l-Bulgarija, rikbet it-titjira tal-Air Malta tas-6.00 a.m.. Madankollu ftit wara t-tluq minn Malta, inqala’ argument bejn il-mara u membru tal-ekwipaġġ li insistiet li l-mara kellha tilbes il-maskra tul it-titjira.
Il-mara madankollu rrifjutat minkejja li ġiet imwissija dwar il-possibbiltà ta’ riskju tas-saħħa li hija kienet qed tesponi lil dawk abord it-titjira.
Kaġun ta’ dan il-kaptan ħa d-deċiżjoni li jdawwar it-titjira lura lejn Malta u għarraf lill-Pulizija dwar l-inċident.
Il-mara aktar tard ittieħdet il-Qorti taħt arrest fejn ammettiet li ma kinitx obdiet struzjonijiet tal-membri tal-ekwipaġġ.
Hija ngħatat sentenza ta’ sitt xhur priġunerija sospiżi għal sentejn.
Il-Maġistrat Donatella Frendo Dimech wissiet lill-mara li l-imġieba tagħha poġġiet f’riskju lill-passiġġieri l-oħrajn u dan ma setax jiġi ttollerat.
Il-Prosekuzzjoni tmexxiet mill-Ispettur Hubert Gerada, filwaqt li l-avukat Simon micallef Stafrace deher għall-mara.
