Meta llum jinagħta bidu għas-Serie A, iċ- champions Napoli jibdew id-difiża tagħhom għand Sassuolo.
Interessanti huwa l-fatt li ż-żewġ timijiet tal-belt ta’ Milan, Inter u Milan li jaqsmu bejniethom Stadio San Siro, se jilagħbu l-partita tagħhom f’darhom f’dan il-programm … Milan kontra Cremonese llum u Inter kontra Torino, nhar it- Tnejn … xi ħaġa li rari tiġri fil- kampjonat.
Sassuolo v Napoli – L- ewwel partita ta’ Napoli hija meqjusa bħala waħda delikata hekk kif imorru għand Sassuolo li fl-istaġun li għadda ddominaw is-Serie B u spiċċaw fl-ewwel post tal-klassifika bi 82 punt minn 38 partita.
In-Naplitani ġew imsaħħa bl-akkwist tal-internazzjonali Belġjan, Kevin de Bruyne, mingħand Manchester City.
Peró, l-istess Naplitani kellhom l-isfortuna li jitilfu lill-attakkant internazzjonali Belġjan, Romelu Lukaku li se jdum barra mill-azzjoni erba’ xhur minħabba injury muskolari fil-koxxa.
Min-naħa tagħhom, Sassuolo ma jistgħux jinkludu lis-sospiż, Jay Idzes.
Inter v Torino – Inter iridu jpattu bil-kbir għad-diżappunt tal-istaġun li għadda meta spiċċaw ma rebħu xejn minkejja li kienu qed jisfidaw għal diversi unuri fosthom il-kampjonat, il-Coppa Italia, is-Super Cup Taljana, il-UEFA Champions League u t-Tazza tad-Dinja tal-Clubs.
Il-coach issa huwa Christian Chivu li ħa post Simone Inzaghi fit-tmun. Chivu, li hu wkoll eks-player Nerazzurro, hu fiduċjuż li jista’ jwassal lil Inter biex jilħqu l-objettivi tagħhom.
Inter ma jistgħux jutilizzaw lis-sospiż, Hakan Calhanoglu, filwaqt li Torino ma jistgħux jinkludu lil Ardian Ismajli, Duvan Zapata, Alieu Njie, Pietro Pellegri u Perr Schuurs minħabba li jinsabu mweġġgħin.
Milan v Cremonese – Milan jilqgħu lit-team promoss ta’ Cremonese u l-attrazzjoni prinċipali se tkun immirata fuq il-coach il-ġdid, Maximiliano Allegri, u l-akkwist il-ġdid, il-Kroat Luca Modric, li ffirmawh mingħand Real Madrid. U minkejja li għandu 39 sena żgur li se jkun vitali fil-pjani ta’ Allegri.
Ir-Rossoneri se jinżlu bl-aqwa formazzjoni possibbli bl-eċċezzjoni ta’ Santiago Gimenez li jinsab sospiż.
Juventus v Parma – Juventus jibdew favoriti li jieħdu t-tliet punti kontra Parma li fl-istaġun li għadda spiċċaw fil-15-il post.
Il-coach, Igor Tudor, ingħata l-fiduċja biex ikompli jiggwida lit-team wara li f’nofs l-istaġun li għadda ingħata l-kariga wara tkeċċija ta’ Thiago Motta, fejn kiseb bosta riżultati pożittivi.