Matul dawn it-tliet ijiem tkompli tintlagħab l-24 ġurnata tas-Serie A fejn Inter jistgħu jkomplu jkabbru l-vantaġġ fil-quċċata tal-klassifika.
Sassuolo v Inter – Inter immorru jilagħbu għand Sassuolo li jinsabu xxamplati f’nofs il-klassifika mingħajr l-ebda periklu tar-relegazzjoni.
Bħalissa, in-Nerazzurri għaddejjin minn forma brillanti meta fl-aħħar 11-il partita huma kisbu 30 punt, jiġifieri 10 rebħiet.
Iżda din il-partita xorta tista’ titqies bħala waħda delikata u Inter iridu juru rispett massimu lejn l-avversarji.
Barra minn hekk se tippreżenta dwell ferm interessanti bejn Lautaro Martinez ta’ Inter u Domenico Berardi ta’ Sassuolo.
Min-naħa tagħhom, Inter għandhom bosta players imweġġgħin fosthom, Kristjan Asllani, Hakan Calhanoglu, Nicolo Barella u Denzel Dumfries.
Genoa v Napoli – Hekk kif Napoli jinsabu konxji li t-tamiet tagħhom għar-rebħ tat-titlu tarulhom minħabba li jinsabu disa’ punti taħt il-leaders Inter, issa jikkonċentraw li jikkwalifikaw għal post fil-UEFA Champions League.
Huma jridu wkoll jinsew id-diżappunt li sfaw eliminati minn din il-kompetizzjoni biex l-istaġun tagħhom huwa kważi mitmum.
Din mhix se tkun partita faċli minħabba li Genoa jinsabu fil-bżonn tal-punti hekk kif jinsabu fin-naħa t’isfel tal-klassifika … sitt punti ‘l bogħod miż-żona l-ħamra.
Il-Partenopei għandhom lista ta’ players imweġġgħin li huma Giovanni Di Lorenzo, Michael Folorunsho, David Neres, Amir Rrahmani, Andre-Frank Zambo Anguissa, Billy Gilmour, Pasquale Mazzocchi, Kevin De Bruyne u Matteo Politano.
Juventus v Lazio – Juventus jospitaw lil Lazio f’dik li hija meqjusa bħala logħba diffiċli.
Il-Bianconeri għandhom iċ-ċans li jaqbżu fit-tielet pożizzjoni jekk Napoli jfallu u huma joħorġu rebbieħa.
Fil-kampjonat, it-team tal-coach Luciano Spalletti, ġej minn żewġ rebħiet li fihom skorjaw seba’ goals u sofrew wieħed biss.
Min-naħa l-oħra, rebħa hija prioritá għal Lazio minħabba li qed jitbegħdu miż-żona Ewropea.
Milan v Como – Il-partita bejn Milan u Como kellha tiġi posposta minħabba li San Siro kellu jospita ċ-ċerimonja tal-ftuħ tal-Olimpjadi tax-Xitwa.
Kien hemm il-ħsieb li dan il-konfront jintlagħab fl-Awstralja iżda minħabba l-kritika qawwija, il-Lega Serie A ċediet għall-pressjoni li din il-partita għandha tintlagħab fl- Italja u f’ebda pajjiż ieħor.