Minħabba l-festi tal-Għid il-Kbir, għada mhux jintlagħbu l-partita tas-Serie A u għaldaqstant illum jintlagħbu ħames partiti, bil-ħamsa l-oħra jintlagħbu nhar it-Tnejn li ġej.
B’Inter jersqu aktar lejn ir-rebħ tat-titlu, it-taqtiegħa hija bejn min se jispiċċa fit-tliet postijiet sussegwenti.
Iżda filwaqt li f’dan il- programm Inter jibdew favoriti meta jospitaw lil Empoli, mhux l-istess jista’ jingħad għal Milan u Juventus meta jmorru jilagħbu għand Fiorentina u Lazio rispettivament.
Jekk ir-Rossoneri u l-Bianconeri jonqsu milli jiksbu t-tliet punti, Bologna, li jinsabu fir-raba’ post tal- klassifika, jimmiraw li japprofittaw biex jersqu aktar lejhom.
Inter v Empoli – Inter jilqgħu lil Empoli fejn jimmiraw li jirritornaw għar- rebħ wara d-draw ta’ 1-1 kontra Napoli.
Wara li sfaw eliminati minn Ateltico Madrid mill- UEFA Champions League, issa Inter għandhom it-triq imwittija biex jirbħu l-Iscudetto … meta jonqoshom 13-il punt hekk kif fadal disa’ partiti għat-tmiem.
Peró, huma se jkollhom jgħaddu mingħajr is-servizzi tal-players imweġġgħin, Juan Cuadrado, Stefano Sensi, Marko Arnautovic u Carlos Augusto.
Dan minbarra li huma ġew milquta wkoll mill-każ ta’ Francesco Acerbi li allegatament indirizza kumment razzist lejn id-difensur Brażiljan ta’ Napoli, Juan Jesus.
Fiorentina v Milan – Milan imorru jilagħbu għand Fiorentina li ilhom weqfin għal dawn l-aħħar ġimagħtejn minħabba li l-aħħar partita tagħhom, dik kontra Atalanta, ġiet posposta minħabba l-mewt għall-għarrieda tad-direttur sportiv tagħhom, Joe Barone, wara li sofra minn attakk f’qalbu.
Milan ġejjin minn rebħa ta’ 3-1 kontra Verona barra minn darhom u jimmiraw li jirreġistraw r-raba’ rebħa infila biex iżommu t-tieni pożizzjoni.
Min-naħa ta’ Fiorentina, dawn jinsabu fil-bżonn tal- punti biex ikomplu jisfidaw għal post fil-UEFA Europa League.
Filwaqt li Milan ma jistgħux jużaw lil Tommaso Pobega, il-Viola għandhom lil Gaetano Castrovilli, Oliver Christensen qed jirkupraw minn injury u Lucas Beltran jinsab sospiż.
Lazio v Juventus – Juventus imorru fi Stadio Olimpico biex jaffrontaw lil Lazio.
Iż-żewġ timijiet jimmiraw li jirritornaw għar- rebħ għax filwaqt li fl-aħħar ħarġa Lazio sfaw megħluba minn Udinese bl-iskor ta’ 2-1, Juventus spiċċaw fi draw ta’ 0-0 kontra Genoa hekk kif it-tnejn kienu qed jilagħbu f’darhom.
It-telfa ta’ Lazio wasslet għar-riżenja tal-coach, Maurizio Sarri, li kienet ukoll il-ħames waħda f’sitt partiti.
Għaldaqstant, issa t-team huwa mmexxi mill-assistent tiegħu, Giovanni Martusciello.
Patric u Nicolo Rovella jibqgħu barra għal Lazio iżda jirritorna Mattéo Guendouzi minn sospensjoni waqt li Mattia De Sciglio u Carlos Alcaraz huma barra għal Juventus.
