B’Napoli jilagħbu tard il-bieraħ filgħaxija, Inter jilqgħu lil Udinese f’dik li hija meqjusa bħala partita delikata.
Atalanta, Roma u Milan, li jinsabu fit-tielet post, jimmiraw li jżommu l-pressjoni fuq Inter hekk kif it-taqtiegħa għall-ewwel erba’ postijiet qed tiżvolġi f’waħda mill-aktar interessanti.
Inter v Udinese – Inter jospitaw lil Udinese fejn jimmiraw li jsaħħu t-tieni pożizzjoni.
Fil-veritá, Napoli ħarbu bil-kampjonat u ċ-ċans li jintlaħqu huwa wieħed remot.
Għaldaqstant, in-Nerazzurri jridu juru l-konsistenza minħabba li l-vantaġġ tagħhom huwa dak ta’ tliet punti biss mit-timijiet li jinsabu fit-tielet post.
Barra minn hekk, huwa jridu jirritornaw għar-rebħ wara li fl-aħħar ħarġa tagħhom ġew miżuma fi draw ta’ 0-0 kontra Sampdoria.
Huma jridu wkoll iżommu f’rashom li logħba li jmiss hija dik kontra Porto mill-ewwel leg tal-Aħħar 16 tal-UEFA Champions League minħabba xi injuries.
Huma għandhom lil Robin Gosens u Joaquin Correa mweġġgħin filwaqt li Gerard Deulofeu se jkun nieqes għal Udinese.
Monza v Milan – Dan hu dwell bejn żewġ timijiet mill-istess reġjun fin-naħa ta’ fuq tal-Italja.
Inċidentalment il-president ta’ Monza, Silvio Berlusconi, kien imexxi lil Milan lura fiż-żmien fejn jibqa’ msemmi għall-unuri prestiġjużi li rebaħ.
Huwa mperattiv għar- Rossoneri li jiksbu t-tliet punti minħabba li jistgħu jinqatgħu mill-isfida għall-ewwel erbgħa … u Monza ma huma se jagħmlulhom l-ebda pjaċir hekk kif jinsabu xxamplati f’nofs il-klassifika mingħajr l-ebda pressjoni.
Milan għandhom lit-tliet players, Sergio Dest, Ismael Bennacer u Mike Maignan, imweġġgħin.
Roma v Verona – Roma jilqgħu lil Verona fejn huma favoriti li jiksbu t-tliet punti kontra team li jinsab fiż-żona tar-relegazzoni.
Il-Giallorossi, għadhom kif ġew miżmuma fi draw diżappuntanti ta’ 1-1 kontra Lecce biex fallew żewġ punti mill-aktar importanti u għaldaqstant ma jistgħux jerġgħu jfallu.
Huma se jkollhom jgħaddu mingħajr is-servizzi tal-imweġġa’ Leonardo Spinazzola.
Atalanta v Lecce – Atalanta jimmiraw li jkomplu jibnu fuq ir-rebħa ta’ tmiem il-ġimgħa li għadda meta barra minn darhom għelbu lil Lazio bl-iskor ta’ 2-0.
Il-Bergamaschi jittamaw li Ademola Lookman ikun fil-forma solita tiegħu meta bħalissa huwa l-aqwa skorer tat-team bi 12-il goal.
Huma se jkunu bl-aqwa formazzjoni possibbli.
Spezia v Juventus – Din hija partita ta’ formalitá għal Juventus meta jmorru jilagħbu għand Spezia.
Dan minħabba li l-istaġun tagħhom huwa mitmum minħabba li jinsabu fis-disa’ post wara li tnaqqsulhom 15-il punt bħala passi dixxiplinari.
