Meta tintlagħab l-aħħar ġurnata ta’ tmiem l- ewwel round tas-Serie A, il-leaders Inter u Juventus li jinsabu żewġ punti taħthom, m’għandhomx ifallu hekk kif jilagħbu kontra Verona u Salernitana rispettivament.
Inter v Verona – Inter jimmiraw li jirritornaw għar- rebħ meta jospitaw lil Verona li jinsabu fis-17-il post tal-klassifika u fil-periklu li jitilfu posthom mal-kbar.
Fl-aħħar ħarġa tagħhom, in-Nerazzurri ġew miżmuma fi draw ta’ 1-1 minn Genoa liema partita jridu jinsew kemm jista’ jkun malajr minħabba li ma kienux fl-aqwa tagħhom fejn ħassew in-nuqqas ta’ Lautaro Martinez li qed jirkupra minn injury.
Dan ir-riżultat ippermetta lil Juventus biex inaqqsu d-distakk għal żewġ punti f’ras il-klassifika.
Peró, l-aħbar it-tajba għal Inter hija li ż-żewġ players, Martinez u Federico Dimarco mistennija li jkunu fil-formazzjoni inizjali wara li l-Erbgħa u l-Ħamis niżlu għat-taħriġ b’mod regolari.
Madankollu, Juan Cuadrado jibqa’ barra mill-azzjoni minħabba li jinsab imweġġa’.
Salernitana v Juventus – Juventus għandhom impenn mhux daqstant diffiċli meta jmorru jilagħbu għand Salernitana li jinsabu fil-qiegħ tal-klassifika.
Din se tkun ripetizzjoni tal-logħba ta’ nhar il-Ħamis li għadda meta Juventus laqgħu lill-istess Salernitana fir-round tal-Aħħar 16 tal-Coppa Italia u għelbuhom b’mod faċli bl-iskor ta’ 6-1.
L-objettiv tat-team immexxi mill-coach, Massimiliano Allegri, huwa li jibqa’ jżomm il-pass ma’ Inter fejn iż-żewġ timijiet bħal donnhom qed jinqatgħu għalihom.
Il-Bianconeri ma jistgħux jinkludu lil Alex Sandro, Moise Kean u Mattia de Sciglio li huma mweġġgħin, b’Manuel Locatelli huwa sospiż.
Min-naħa ta’ Salernitana se jkollhom jgħaddu mingħajr Lorenzo Pirola, Boulaye Dia u Guillhermo Okoca, għall-istess raġuni.
Empoli v Milan – Milan imorru għand Empoli f’dik li hija meqjusa bħala partita delikata … għall-fatt li minkejja li Empoli jinsabu fil-post ta’ qabel l-aħħar, ir-Rossoneri xejn ma huma konsistenti.
Il-pressjoni tinsab fuq il-coach, Stefano Pioli, hekk kif il-Milanisti jinsabu fit- tielet post … iżda distakkati b’disa’ punti mir-rivali eterni, Inter.
Għaldaqstant, rebħa hija mperattiva biex ma jintlaħqux minn Fiorentina li jinsabu fir-raba’ post.
Milan għandhom barra lil Samuel Chukwueze u Ismael Bennacer li huma sospiżi filwaqt li Pierre Kalulu, Marco Sportiello, Yunus Musah u Malick Thiaw qed jirkupraw minn injury.
Torino v Napoli – Torino jilqgħu lil Napoli li bħalissa xejn ma huma sejrin tajjeb wara telfa ta’ 2-0 kontra Roma u d-draw ta’ 0-0 kontra Monza.
Huwa mportanti li joħorġu bit-tliet punti minn Turin minħabba l-biżgħa li jistgħu jiġu eliminati minn xi kompetizzjoni Ewropea.
