Meta tintlagħab il-21 ġurnata tas-Serie A, il-partita bejn Juventus u Milan hija l-attrazzjoni ewlenija fejn iż-żewġ timijiet iġeddu r-rivalitá hekk kif fis-snin 70 u 80 kienu jiddominaw ix-xena Taljana.
Juventus v Milan – Juventus jilqgħu lil Milan fejn xejn għajr minn rebħa ma tissodisfa l-kriterji taż-żewġ timijiet minħabba li qed jisfidaw għall-kwalifikazzjoni tal-UEFA Champions League hekk kif inqatgħu għal kollox mill-isfida għar-rebħ tal-Iscudetto.
Juventus jistgħu jiftaħru li huma l-uniku team li għadu ma ġiex megħlub iżda min-naħa l-oħra għandhom ir-rekord li ġew miżmuma 13-il darba, li jfisser li minn 20 partita huma fallew 26 punt!
Min-naħa tagħhom, Milan, bħal donnhom sabu l- forma taħt ir-responsabbiltá tal-coach, Sergio Conceicao.
Dan huwa l-180 konfront bejn dawn iż-żewġ timijiet fejn il-bilanċ ixaqleb favur Juventus li rebħu 68, Milan rebħu 53, bit-58 l-oħra jispiċċaw fi draws.
Atalanta v Napoli – Il- leaders Napoli jmorru għand Atalanta f’dik li hija meqjusa bħala partita delikata.
Ħadd miż-żewġ timijiet ma jista’ jitlef il-punti minħabba li Inter, li jinsabu fit-tieni post, ikunu lesti biex japprofittaw mis-sitwazzjoni.
Filwaqt li Napoli ġejjin minn rebħa ta’ 2-0 fuq Verona, Atalanta ġejjin minn draw ta’ 1-1 kontra Juventus biex issa jinsabu fit-tielet post, erba’ punti taħt l-istess Partenopei.
Inter v Empoli – Wara li ġew miżmuma fi draw ta’ 2-2 f’darhom kontra Bologna, Inter jerġgħu jilagħbu f’darhom, din id-darba kontra Empoli.
Rebħa hija imperattiva għan-Nerazzurri u ma jistgħu jwaqqgħu l-punti anke jekk lagħbu partita inqas. Huma jinsabu b’distakk ta’ tliet punti minn Napoli u għaldaqstant m’hemmx lok għal aktar telf ta’ punti.
Min-naħa tagħhom, Empoli jimmiraw li jirreġistraw sorpriża meta huma jinsabu fil-bżonn tal-punti hekk kif huma jinsabu fit-13-il post tal-klassifika u żewġ punti biss fuq iż-żona tar-relegazzjoni.
Verona v Lazio – Wara bidu mill-aktar pożittiv fejn taw ukoll l-impressjoni li se jkunu fost l-isfidanti ewlenin għar-rebħ tal-kampjonat, Lazio jmorru għand Verona li jinsabu punt wieħed biss fuq iż-żona l-ħamra u għaldaqstant jinżlu għal rebħa.
Lazio jridu jirriorganizzaw minħabba li f’dawn l-aħħar tliet ħarġiet huma kisbu biss żewġ punti bil- konsegwenza li ċedew l-isfida.
Peró għadhom fit-taqtiegħa għall-post fil-UEFA Champions League.
