Raġel ta’ 30 sena residenti l-Belt Valletta, ittieħed l-Isptar Mater Dei wara li kien involut f’inċident tat-traffiku.
Kienu għall-ħabta tal-10:30 a.m, x’ħin il-Pulizija ġiet infurmata li kien hemm bżonn l-assistenza tagħha fi Triq Nazzjonali, il-Furjana.
Il-Pulizija tad-Distrett marru mill-ewwel fuq il-post u minn investigazzjonijiet preliminari li saru rriżulta li r-raġel tilef il-kontroll tal-mutur Honda li kien qed isuq u waqa’.
Fuq il-post issejjaħ tim mediku li ta l-ewwel għajnuna u ambulanza ħadet lir-raġel l-Isptar Mater Dei għall-kura meħtieġa. Iktar tard, hu ġie ċċertifikat li qed isofri minn ġrieħi gravi.
L-investigazzjonijiet tal-Pulizija għadhom għaddejjin.
