Is-snowboarder Maltija/Amerikana, Jenise Spiteri, se tkun qed tikteb l-istorja tal-isport Malti hekk kif se tikkompeti fil-Logħob Olimpiku tax-Xitwa li se jsir f’Beijing proprju matul dan ix-xahar.
Hija attiva ħafna fuq il-mezzi soċjali permezz ta’ diversi vlogs u blogs li tagħmel fuq You Tube, Instagram u Facebook fejn tesprimi n-namra tagħha għall-Isnowboarding li issa sar prattikament ix-xogħol proprja tagħha.
Hija tikkompeti fil-kategorija Half-Pipe f’dan l-isport fejn tieħu bis-serjetá dan kollu, dejjem sabiex ittejjeb il-livell tagħha.
Kif bdiet l-imħabba tiegħek lejn is-snow-boarding?
In-nannu tiegħi kien assoċjat sew mas-silġ hekk kif saħansitra waqqaf kumpanija tal-Ice Skating.
Kien proprju hawn li jien kont tħajjart nibda nipprattika dan l-isport u tista’ tgħid li minn hemm qatt ma ħarist lura.
Kont nitgħaxxaq meta diversi ġurnalisti sportivi kienu jiġu għand in-nannu tiegħi sabiex jagħmlu intervisti mhux biss lili iżda wkoll lis-snowboarders kollha li bdew jagħmlu isem għalihom infushom u għal pajjiżhom.
Iktar m’għadda ż-żmien, iktar bdejt nieħu dan l-isport b’serjetá kbira tant li wara li spiċċajt mill-iskola, iddeċidejt li nintefa’ b’ruħi u ġismi fuqu.
Kien kamp ta’ taħriġ li sar fl-Istati Uniti stess li ċċarali aktar l-ideat tiegħi sabiex nintefa’ litteralment full-time fuq dan l-isport.
It-taħriġ beda jsir intensiv, il-ħiliet tiegħi bdew jitjiebu sew u llum il-ġurnata nista’ ngħid li sirt atleta f’dan l-isport xitwi tant partikolari.
X’inhi l-konnessjoni eżatta tiegħek ma’ Malta?
In-nannu u n-nanna tiegħi huma Maltin. Nannuwi kien jaħdem il-Ħamrun ġo ħanut taż-żraben fejn mhux darba jew tnejn li kien isewwi xi żarbun ukoll.
Kellu l-ħanut fi Triq Qormi fejn kien imfittex ħafna dak iż-żmien u ftit taż-żmien ilu meta kont Malta ħadt ritratt quddiemu.
Madankollu malli bdiet il-gwerra, is-sitwazzjoni saret diffiċli iktar u iktar wara dik il-ħerba kollha li seħħet.
Bħal kull Malti ieħor, ix-xogħol kien qed ikun problema u għalhekk ħafna bdew jemigraw lejn pajjiżi oħra fosthom il- Kanada, l-Awstralja u l-Istati Uniti.
In-nanniet tiegħu għażlu dan l-aħħar pajjiż anke għax sabu lill-kuġin tagħhom minn San Francisco li għenhom ħafna biex jibnu ħajja ġdida.
In-nannu tiegħi kien il-mimmi ta’ għajnejja u spiss kont inkun miegħu anke meta fetaħ il-kumpanija fejn hemmhekk trawwimt għal dan l-ambjent uniku.
Kif qed tipprepara għal-Logħob Olimpiku tax-Xitwa f’Beijing?
Il-ħolma tiegħi kienet dejjem dik li nipparteċipa fil-Logħob Olimpiku tax- xitwa u wara tmien snin ta’ taħriġ kontinwu u sagrifiċċji, ftit tal-jiem oħra se nkun qed naqta’ xewqti proprju fiċ-Ċina eżattament fil-belt kapitali, Beijing.
Wara li segwejt dan il-logħob għal ħafna snin, issa wasal iż-żmien li nwettaq dak li dejjem ħdimt għalih.
Fuq kollox kburija li se nkun qed nirrappreżenta l-pajjiż fejn twieled in-nannu tiegħi. B’xorti ħażina ma kellux jarani nikkompeti għal Malta minħabba li ħalla din id-dinja ftit tas-snin ilu għalkemm naf li minn hemm fuq jinsab kburi b’dak li se nkun qed nagħmel.
B’xorti ħażina, kelli nittardja din il-parteċipazzjoni meta fis-sena 2018 kont ferm viċin li nipparteċipa fl-Olimpjadi ta’ dak iż-żmien iżda kelli nibqa’ barra minħabba li ħassejt uġigħ f’irkoppti.
F’dawn l-aħħar jiem, kont qed nitħarreġ bis-serjetá fuq il-muntanji bejn l-Awstrija u l-Isvizzera sabiex inkun tajba biżżejjed għal dawn il-logħob.
L-Isvizzera hu post fejn sibtu tajjeb sabiex nagħmel is-sessjonijiet tat-taħriġ tiegħi bl-aqwa mod minħabba li hemm muntanji li jagħmlu d-dixxiplina tiegħi waħda ideali.
Fl-istess waqt hemm ħafna xebħ bejn dak li se nsib f’Beijing u għalhekk qed nipprepara b’reqqa għal kull dettall sabiex il-wirja tagħha tkun waħda tajba.
Kif tipprepara ruħek kemm fiżikament kif ukoll psikoloġikament qabel xi kompetizzjoni importanti?
Nipprepara b’mod tajjeb kemm psikoloġikament kif ukoll fiżikament qabel ma nagħmel il-wirja tiegħi fis-silġ.
Nibda nimmaġina dak li nkun se nagħmel, naħseb sew fuq ċerti movimenti li nkun irrid inwettaq sabiex mentalment inkun iffukata. Mill-banda l-oħra, nipprepara ruħi fiżikament permezz ta’ stretching tajjeb u aktar eżerċizzji. Imbagħad, trid temmen fil-potenzjal tiegħek sabiex tasal fejn tixtieq!
Wara li jgħaddu dawn il-Logħob, se jkun hemm ambizzjonijiet u objettivi oħrajn għalik?
Bla dubju, li jekk sportiv ma jpoġġix xi tip ta’ ambizzjonijiet, ma jkunx jista’ jevolvi u fuq kollox itejjeb il-livell tiegħu.
Jien għad fadalli ħafna objettivi, wieħed fosthom hu dak li nipprova tipi oħra ta’ sport fuq is-silġ, ‘l hekk imsejħa Big Mountain li hi waħda estrema iżda li nista’ nagħmilha.
Apparti minn hekk, irrid inkompli nieħu pjaċir nipprattika dan l-isport għax mingħajr dan l-element, żgur li titlef kull interess.”
Tista’ tgħaddi messaġġ lil dawk it-tfal u żgħażagħ li bħalek jixtiequ jimbarkaw fuq karriera ta’ suċċess fl-isport?
L-ewwel u qabel kollox, kif għadni kemm għidt importanti li tieħu pjaċir tipprattika l-isport li tħobb.
Dejjem poġġi objettivi personali u qatt tikkuntenta b’dak li għandek iżda pprova itlob aktar minnek innifsek sabiex tasal aktar ‘il bogħod.
Importanti li jkollok ħajja sana u bilanċjata sabiex tirnexxi aktar. Mill- bqija mur u ħu pjaċir.
Nittama li bil-parteċipazzjoni tiegħi fil-Logħob Olimpiku tax-xitwa f’Beijing, inkun nista’ nispira xi sportiv Malti jew Maltija sabiex jinvolvi ruħu jew ruħha f’xi sport tas-silġ.
Għalkemm meta nitkellem ma’ diversi persuni Maltin li jgħiduli li fil- Gżejjer Maltin ma jinżilx silġ, jien ngħidilhom li lanqas jien ma kbirt f’dan l-ambjent iżda ma qtajtx qalbi …. ħriġt minn dak l-ambjent u mort nimraħ x’imkien ieħor u issa qiegħed jiem biss bogħod milli nipparteċipa f’wieħed mill-aqwa avvenimenti ta’ sport xitwi!
