Lydia Galabe Nadugha, studenta ta’ 29 sena mill-Kamerun baqa’ tinżamm arrestata wara li wieġbet mhux ħatja li ppreżentat estratti bankarji foloz.
L-imputata tinsab f’pajjiżna wara li nħarġitilha viża ta’ biex tistudja u kienet ilha f’Malta għal dawn l-aħħar għaxart ijiem. L-imputata ġiet arrestata fl-uffiċini tal-Aġenzija Identità waqt li kienet qiegħda tistenna hekk kif kienet għamlet appuntament biex iġedded il-permess ta’ residenza.
Kienet l-Aġenzija Identità li nnutat irregolaritajiet f’dokumenti li kienet ippreżentat, li kienu dehru bħala ffalsifikati u li kienu allegatament ukoll ippreżentati lill-bank.
L-Ispettur Charlon Borg qal quddiem il-qorti li r-rapport li sar mill-Aġenzija Identità kien biżżejjed biex jinħareġ mandat ta’ arrest fil-konfront tal-imputata.
Il-Qorti wara li semgħet is-sottomossijiet iddikjarat li l-arrest kien wieħed validu. L-avukat tal-Għajnuna Legali Sarah Giliberti li deher għall-akkużata għamlet talba għall-ħelsien mill-arrest fejn qalet li l-imputata għandha residenza fissa f’pajjiżna.
Il-Prosekuzzjoni oġġezzjonat għal din it-talba u qalet li l-imputata ma kellha l-ebda xogħol irreġistrat mal-Jobsplus u jekk il-viża tagħha tiġi sospiża allura tiġi qisha qed tgħix b’mod illegali f’pajjiżna.
Il-Maġistrat Leonard Caruana qal li l-imputata m’għandha l-ebda rabiet ma’ pajjiżna u għalhekk hemm riskju li taħrab mill-pajjiż. Kien għalhekk li l-Qorti ċaħdet it-talba għall-ħelsien mill-arrest.