It-team nazzjonali Malti tal-Għawm Artistiku taż-Żgħażagħ (Grupp ta’ Età 13-15-il sena) għadu kif irritorna minn Montceau les Mines fi Franza wara parteċipazzjoni ta’ suċċess kbir fit-Tieni Kampjonati Ewropej taż-Żgħażagħ.
Malta kkompetiet flimkien ma’ 19-il pajjiż Ewropew fl-Individual Figures kif ukoll fl-Avvenimenti Solo u Duet Free Events.
Fl-ewwel avveniment tal-Kampjonati, id-Duet Free Preliminary, Zea Montfort u Emily Ruggier inawguraw din il-kompetizzjoni prestiġjuża meta ttellgħu bħala Start Nru 1. Minkejja dan, kisbu 67.4333 punt li poġġewhom fl-14-il post quddiem is-Serbja, il-Polonja, l-Awstrija u l-Iżvezja. .
L-għada, Zea Montfort kienet lura fl-ilma, tikkompeti fl-avveniment Solo Free. Hija kienet it-12-il bidu u kisbet 70.70 punt u poġġiet it-13-il post quddiem il-Polonja, l-Iżvezja, l-Awstrija u s-Serbja.
Fl-istess jum it-tliet atleti kollha kkompetew fl-avveniment Figures b’Zea Montfort kisbet 75.5944 punt, Emily Ruggier 74.1837 u Kylie Zerafa 70.5714.
Bil-punteġġi magħquda miksuba fir-Round Preliminari Solo u Duet u dawk fl-avvenimenti Figures, Zea Montfort ikkwalifikat għall-Finali Solo Free u Emily Ruggier u Zea Montfort ikkwalifikaw ukoll għall-Finali tad-Duet Free.
Fil-għodwa tal-aħħar ġurnata tal-Kampjonati, Zea Montfort ttellgħet bħala Start Nru 3 u kisbet punteġġ kombinat ta’ 148.7944 li poġġietha fit-tmien post quddiem l-Iżrael, il-Polonja, l-Ingilterra u l-Bulgarija.
Wara nofsinhar, Emily Ruggier u Zea Montfort, ittellgħu bħala Start Nru 1, kisbu 145.6891 punt li poġġewhom fil-11-il post quddiem il-Ġermanja.
Dawn ir-riżultati mill-aqwa urew titjib ta’ tmien punti fir-routines li saru fl-edizzjoni tas-sena li għaddiet ta’ dawn il-Kampjonati. Fl-avvenimenti tal-Figures kemm Emily kif ukoll Zea tejbu l-aħjar riżultati personali tagħhom b’disa’ punti meta mqabbla mal-punteġġi tagħhom fl-edizzjoni tas-sena li għaddiet.
Il-Coach Nazzjonali Michelle Hyubner u l-assistenta tagħha Hannah Preca Trapani baqgħu mħeġġa bir-riżultati miksuba u għaddew dawn il-kummenti:
“Il-klassifikazzjoni fit-tmien u fil-11-il post fl-Ewropa kien wieħed surreali. It-titjib ta’ tmien punti f’kull dixxiplina huwa kisba kbira u l-kwalifikazzjoni għall-Finali kienet tal-għaġeb. Dan huwa tabilħaqq mument storiku għall-Għawm Artistiku f’Malta. Ninsabu kuntenti bil-ħidma li wettaqna u ninsabu kburin ħafna bl-atleti tagħna. Huma professjonali ħafna u dedikati u nemmnu li jistgħu jagħmlu saħansitra aħjar biex jilħqu miri ogħla. Nittamaw li l-parteċipazzjoni tagħna f’dawn il-Kampjonati tispira lill-atleti oħra biex jissieħbu fl-isport tagħna, u li r-riżultati miksuba jżidu l-appoġġ li nirċievu. Nixtiequ nirringrazzjaw lill-ASA, lill-Clubs tagħna, lill-Kumitat Olimpiku Maltli (MOC) u lil SportMalta tal-appoġġ tagħhom u nittamaw li issa, aktar minn qatt qabel, ikomplu jappoġġjawna. Jekk naħdmu lkoll flimkien nemmnu li għad niksbu iktar riżultati pożittivi bħal dawn.”
Intant, Joe Caruana Curran, president tal-ASA, ikkummenta hekk:
“Ninsab ferm kuntent bir-riżultati miksuba u nemmen li rridu nkomplu ninvestu f’din id-dixxiplina. Nifraħ lill-atleti tagħna, imma rrid nirringrazzja wkoll lil Michelle u lil Hannah għax-xogħol iebes u d-dedikazzjoni tagħhom. Mingħajr l-isforzi tagħhom, l-atleti tagħna ma kinux jiksbu riżultati daqshekk mill-isbaħ.”
