Persuni bi qraba f’Villa Messina lbieraħ ġew avżati biex ma jmorrux għall-viżti tas-soltu wara li wieħed mill-ħaddiema rriżulta pożittiv għall-Covid-19. Dan is-sit għamel kuntatt ma’ CareMalta fejn ikkonfermawlna li l-każ pożittiv u li l-impjegat kien diġà mlaqqam. Din id-dar tal-anzjani m’hiex magħluqa iżda għandha sular sħiħ f’iżolament minħabba possibbiltà ta’ kuntatt.
Hekk kif il-każijiet ġodda tal-Covid-19 f’Malta reġgħu telgħu b’rata mgħaġġla, Villa Messina kellha tieħu l-prekawzjonijiet meħtieġa minħabba każ pożittiv fost il-ħaddiema tar-residenza.
Il-kelliema għal CareMalta, Simonne Schembri, qaltilna li bħalissa m’hemm ebda residenti fi kwarantina u li m’hemm ebda riżultati ta’ testijiet pendenti. Sadanittant hija infurmatna wkoll li fi żmien ħamest ijiem se jkunu qegħdin jagħmlu swabbing tal-impjegati li setgħu ġew f’kuntatt mal-persuna infettata bil-Covid-19.
Villa Messina, li nfetħet uffiċjalment nhar il-31 ta’ Awwissu tal-1996 u tinsab fil-qalba tar-Rabat. Bħala residenza din tinkludi 104 kmamar u tista’ tilqa’ fiha 218-il anzjan.
