Arsenal qed iħejju biex iniedu offerta tas-sajf ta’ £50m għall-attakkant ta’ Roma, Tammy Abraham.
Il-player ta’ 24 sena ngħaqad mal-Giallorossi mingħand Chelsea fis-sajf li għadda u gawda minn staġun impressjonanti għat-team immexxi minn Jose Mourinho, fejn skorja 24 goal u rreġistra ħames assists f’46 dehra.
Il-Blues għandhom klawsola ta’ xiri lura ta’ €80m, għalkemm it-team immexxi minn Thomas Tuchel ma jistax jattivaha sas-sajf li ġej, u dan l-aħħar kien hemm spekulazzjoni li l-player internazzjonali Ingliż jista’ jirritorna fil-Premier League dan is-sajf, b’Manchester United huwa mifhum li huma ammiraturi tiegħu.
Madankollu, jidher li Arsenal bħalissa jinsabu fil-pole position għall-akkwist potenzjali tiegħu, bil-Gunners qed ifasslu offerta ta’ £50m għall-attakkant ċentrali fis-suq li ġej.
Offerta għal Abraham x’aktarx tiddependi fuq jekk il-Gunners jistgħux jassiguraw post mal-ewwel erbgħa fil-klassifika tal-Premier League, li jfisser post fiċ-Champions League fl-istaġun li ġej.
Abraham hu maħsub li jkun stabbilit fl-Italja iżda jkun interessat li jirritorna Londra matul it-tieqa tat-trasferimenti ta’ dan is-sajf, filwaqt li Roma huma miftuħa għal bejgħ bi flus sostanzjali.
Il-player Ingliż, li għandu kuntratt mal-club tiegħu tas-Serie A sa Ġunju 2026, skorja 30 darba u rreġistra 12-il assist fi 82 dehra għal Chelsea qabel ingħaqad ma’ Roma.
