minn Cristian Muscat
Illum u għada tintlagħab il-11-il ġurnata tal-Malta Premier li jfisser li se jiġi fi tmiemu l-ewwel round biex it-timijiet jinqasmu bejn it-Top Six u l-Bottom Six.
Interessanti huwa l-fatt li t-taqtiegħa għas-sitt post li hija bejn tliet timijiet – Gzira United, Hamrun Spartans u Marsaxlokk.
Filwaqt li Gzira u Hamrun se jilagħbu kontra xulxin, Marsaxlokk joffrontaw lil Hibernians.
Bejn dawn it-tliet timijiet hemm bosta permutazzjonijiet min minnhom jista’ jispiċċa fis-sitt post.
Jekk il-konfront bejn il-Maroons u l-Ispartans jintemm fi draw, ikunu l-Gżirjani li jaqtgħu l-passaġġ tagħhom minħabba li bħalissa qed igawdu tliet punti vantaġġ fuq iż-żewġ timijiet l-oħra.
Għaldaqstant, xejn għajr minn rebħa ma tissodisfa l-kriterji tal-Ħamruniżi.
Jekk min-naħa l-oħra, ix-Xlukkajri jegħlbu lil Hibernians, it-tliet timijiet jispiċċaw l-ewwel round bl-istess ammont ta’ punti.
Għaldaqstant, tidħol ir- regola tal-konfronti diretti.
Peró kull team ikun rebaħ partita kull wieħed fuq kull avversarju.
F’dan il-każ … Hamrun Spartans jekk ikunu għelbu lil Gzira (fil-logħba ta’ għada) wara li dawn tal-aħħar għelbu lil Marsaxlokk (1-0) filwaqt li l-istess Marsaxlokk għelbu lil Hamrun Spartans (3-2).
Għaldaqstant tiġi applikata r-regola tad-differenza ta’ goals.
Din id-differenza ta’ goals tat-tliet timijiet bħalissa hija – Gzira U. (+1), Hamrun Spartans (+3) u Marsaxlokk (-3).
Skond il-kalkoli, teżisti possibbiltá kbira li jkunu Hamrun Spartans li jkollhom id-dritt li jilagħbu mal-ewwel sitta … sakemm Marsaxlokk ma jegħlbux lil Hibernians b’differenza ta’ sitt goals aktar mill-iskor tar-rebħa ta’ Hamrun fuq Gzira United … dejjem jekk dan iseħħ.
Fil-veritá, iċ-ċansijiet ta’ Marsaxlokk huma ferm limitati għalkemm fil-football jista’ jiġri kollox.
Partita oħra interessanti hija dik bejn il-leaders Birkirkara u Floriana li għadhom l-uniċi żewġ timijiet mingħajr telfa.
Gzira U. v Hamrun S. – Dan huwa konfront mill- aktar mistenni hekk kif Harmun Spartans jimmiraw li joħorġu rebbieħa wara erba’ telfiet konsekuttivi liema sensiela negattiva kienu ilhom ma jsofruha bejn il-5 ta’ April u t-22 tal-istess xahar tas-sena 2017.
Dak in-nhar huma kienu tilfu kontra Floriana (2-1), Sliema W. (2-0), Mosta (2-1) u Pembroke A. (2-1).
Rebħa kontra Gzira ittaffilhom id-diżappunt tal- kampjonat meta wieħed iqis li qed jiddefendu t-titlu.
Huma għandhom lil Mattias Ellul sospiż wara li tkeċċa kontra Marsaxlokk.
Marsaxlokk v Hibernians – Wara bidu mill-aktar negattiv, issa Marsaxlokk ilhom ma jitilfu għal dawn l-aħħar ħames partiti, bi tliet rebħiet u żewġ draws.
Iżda jistgħu jkunu tard fl-objettiv tagħhom hekk kif il-kwalifikazzjoni mal- ewwel sitta hija xi ftit improbabbli.
Hibernians jinżlu għal dan il-konfront mingħajr l-ebda pressjoni għalkemm jagħmlu minn kollox biex jibqgħu jżommu l-kuntatt mal-leaders Birkirkara bil- possibbiltá li jistgħu jaqbżu fit-tieni post.
Ix-Xlukkajri ma jistgħux jinkludu lis-sospiż Nicola Raden.
Birkirkara v Floriana – Din hija partita bejn żewġ timijiet bla telfa.
Peró, Birkirkara qed juru li huma t-team tal-mument meta fallew biss żewġ punti fid-draw ta’ 3-3 kontra Melita, fl-ewwel partita tal-istaġun.
Minn dak in-nhar warrbu għal kollox dak li ġie quddiemhom billi rebħu disa’ partiti nfila … bi Floriana jistgħu jkunu l-vittmi li jmiss, ġejjin minn ħames rebħiet u ħames draws.
Jekk l-Istripes joħorġu rebbieħa, ikunu favoriti netti li jirbħu l-ewwel fażi.
Min-naħa l-oħra, rebħa għall-Greens tkun tfisser li jiftħu beraħ il-kampjonat.
Iżda huma għandhom lil Matias Nicola Garcia sospiż filwaqt li Birkirkara jkunu msaħħa bir-ritorn ta’ Pablo Leonel Gaitan minn sospensjoni.
Naxxar L. v Sliema W. – Sliema Wanderers jibdew favoriti netti li joħorġu bit- tliet punti iżda jridu juru rispett massimu lejn Naxxar Lions li ġejjin minn wirja kbira minkejja li ħarġu telliefa bl-iskor ta’ 1-0 kontra Birkirkara.
Huma kienu dixxiplinati u ffrustraw lill-Karkariżi li skorjaw lejn it-tmien.
Il-Lions għandhom lil Westherley Garcia Nogueira sospiż iżda Pedro De Assis Barreto jirritorna minn sospensjoni.
Mosta v Balzan– Din hija partita ta’ formalitá bejn Mosta, li ssiġillaw posthom fit-Top Six, u Balzan, li ddiżappuntaw bil-kbir, biex fit-tieni round se jilagħbu mal-aħħar sitt timijiet … wara li sofrew tliet telfiet minn daqstant partiti mingħajr ma skorjaw goal.
Zabbar SP v Melita – Dan huwa konfront li se jlaqqa’ lil Zabbar St Patrick u lil Melita għall-ewwel darba fl-istorja fl-ogħla diviżjoni … hekk kif it-tnejn se jilagħbu fil-Bottom Six.
Iż-Żabbarin ma jistgħux jagħmlu użu mis-sospiż Marcelo Barros Santos filwaqt li Melita se jkunu msaħħa bir-ritorn ta’ Aldair Simanca Pena minn sospensjoni.