Team Malta temm il-parteċipazzjoni tiegħu fir-raba’ edizzjoni tal-Logħob Olimpiku tas-Sajf taż-Żgħażagħ, li saru f’Dakar, fis-Senegal. Dawn kienu l-ewwel Logħob Olimpiku li qatt saru fil-kontinent Afrikan.
Malta kienet rappreżentata minn ħames atleti li kkompetew fl-atletika, fl-għawm u fil-ġinnastika artistika. Il-Kumitat Olimpiku Internazzjonali alloka l-postijiet tagħhom minn fost id-dixxiplini li l-Kumitat Olimpiku Malti kien ressaq bħala l-preferenzi tiegħu.
L-għawwiema Sam Camilleri u Yulya Anne Bonnici ġarrew il-bandiera Maltija fiċ-Ċerimonja tal-Ftuħ.
Fl-għawm, Sam Camilleri kellu jikkompeti fit-tellieqa tat-800 metru freestyle, l-avveniment ewlieni tiegħu, iżda dan tħassar minħabba problema teknika. Huwa mbagħad ikkompeta fl-400 metru u fil-200 metru butterfly. F’din tal-aħħar, Camilleri kkwalifika għall-finali, fejn spiċċa fis-sitt post, u sar l-ewwel għawwiem Malti li wasal sa finali f’dawn il-Logħob.
Yulya Anne Bonnici kkompetiet fil-50, il-100 u l-200 metru stil ħieles tan-nisa.
Fl-atletika, Matthew Azzopardi kkompeta fit-800 metru. F’tellieqa tattika, huwa żamm mal-grupp matul l-ewwel dawra u avvanza fl-aħħar liwja biex daħal fil-ħames post f’ħin ta’ 1:58.09, u b’hekk kiseb post fil-finali.
Fil-finali, huwa spiċċa fis-seba’ post f’ħin ta’ 1:58.77.
Nick Bonett ikkompeta fis-semifinali tal-400 metru u spiċċa fis-sitt post fit-tellieqa tiegħu f’ħin ta’ 50.06 sekonda.
Fil-ġinnastika artistika, Janet Galea kkompetiet fil-kompetizzjoni individwali tal-apparat kollu u kisbet 44.965 punt, biex spiċċat fil-31 post fil-klassifika finali. Hija wettqet qabża b’saħħita fil-vault u, għall-ewwel darba f’kompetizzjoni, ippreżentat element ġdid fuq il-balance beam. Waqgħa minn fuq l-uneven bars swietha 2.4 punti. Hija temmet il-kompetizzjoni bl-eżerċizzju tal-art, li fih teċċella l-aktar.
Charlene Attard, Direttur tal-Isport, qalet li “Il-Logħob Olimpiku taż-Żgħażagħ offrew lill-atleti Maltin esperjenza interessanti, eċċitanti u mimlija sfidi. Żiedet tgħid li t-tħassir tal-avveniment ewlieni ta’ Camilleri kien ta’ diżappunt, iżda huwa wera l-ħila tiegħu billi spiċċa fis-sitt post fil-finali” .
Skond Attard, “il-fatt li żewġ atleti waslu sal-finali u t-tlieta l-oħra taw wirjiet sodi juri li l-istrateġija tal-Kumitat Olimpiku Malti li jiffoka fuq l-iżvilupp taż-żgħażagħ qed tkompli tgħinu jilħaq l-għan tiegħu li l-atleti Maltin jikkompetu f’livell daqshekk għoli.”
Team Malta kien immexxi minn Johanna Grech bħala Chef de Mission, filwaqt li l-atleti ngħataw l-appoġġ ta’ Natalya Berehova, Andria Friggieri u Tiziana Zammit.
Il-Kumitat Olimpiku Malti rringrazzja lill-Kumitat Olimpiku Internazzjonali, lill-federazzjonijiet nazzjonali, lill-kowċis, lill-uffiċjali u lill-familji għall-appoġġ li taw lill-atleti matul it-tħejjija tagħhom u waqt il-parteċipazzjoni tagħhom f’Dakar.
