Alejandro Mizsan tifel ta’ disgħa snin spiċċa b’wiċċu “meqrud” wara li attakkah pitbull. Hu kien qiegħed jilgħab flimkien ma’ tfal oħrajn ħdejn id-dar tagħhom f’Wexford f’Dublin
Kienu l-ħbieb tiegħu stess li sejħu għal għajnuna li b’mod immedjat ittieħed l-isptar f’Dublin u mill-ewwel beda jiġi operat.
Il-ġenituri tiegħu ppubblikaw ritratt li fih it-tifel jidher b’wiċċu sfigurat.
Ħuħ il-vittma qal li Alejandro mistenni li jibqa’ l-isptar anke sal-aħħar ta’ Jannar. L-akbar inkwiet għal familja hu li mhux għax se jdum l-isptar, iżda minħabba l-ġrieħi li sofra, it-tobba qalulhom li se jkun diffiċli mmens biex jerġa’ jibda jitkellem.
“Wiċċu hu kompletament meqrud. Bħalissa mhux qiegħed jikkomunika magħna, u t-tobba qalulna li se jkun ferm diffiċli li xi darba jerġa’ jibda jitkellem. Ħija mhux se jkun l-istess tifel li kien,” qal ħu Alejandro f’intervista li ta lill-ġurnali Ingliżi.
Dwar dan il-każ il-pulizija sressqet raġel ta’ 27 sena l-qorti li jirriżulta li hu sid il-kelb. Huwa ġie akkużat li minħabba l-kelb tiegħu Alejandro sofra ġrieħi permanenti u seta’ jitlef ħajtu.
