Tifla ta’ 12-il sena, li x-xahar li għadda kellha tagħmel trapjant tal-qalb, qed tiċċelebra dak li ddeskriviet bħala l-aqwa rigal li qatt irċeviet wara li qalulha li tinsab f’saħħitha biżżejjed biex tmur id-dar għall-Milied.
Tanesha Ives twieldet b’kundizzjoni f’qalbha u minħabba f’hekk hija kellha bżonn operazzjoni meta kellha biss ħames ġimgħat.
Minn dak iż-żmien hija kellha tqatta’ ħafna ħin dieħla u ħierġa l-isptar u saħansitra kellha bżonn tagħmel pacemaker permanenti meta kellha biss 18-il xahar.
Wara li tobba esperti ħadu d-deċiżjoni diffiċli li jagħmlu trapjant tal-qalb din is-sena, Tanesha kellha tittieħed fi Newcastle, li jfisser mal-100 mil ‘il bogħod mill-ħbieb u l-familja tagħha.
B’xorti t-tajba l-operazzjoni kienet waħda ta’ suċċess iżda Tanesha kienet kważi rrassenjat ruħha li kienet se tqatta’ l-perjodu tal-festi fis-sodda ġewwa l-isptar fi Newcastle.
Iżda, hija rċeviet aħbar mill-isbaħ, f’dak deskritt bħala wieħed mill-aqwa rigali li qatt irċeviet, wara li t-tobba qalulha li kienet tajba biżżejjed biex tmur id-dar għall-Milied u tqatta’ l-festi flimkien ma’ ommha Amanda Bell u oħta Ashante ta’ sitt snin.
