Raġel ta’ 32 sena residenti l-Ħamrun ġie illiberat bil-kundizzjoni li ma jagħmilx reat ieħor fi żmien tliet snin wara li nstab ħati mill-Maġistrat Monica Vella li ta fastidju u kkaġuna biża’ fuq ommu hekk kif kien jitlobha l-flus għad-droga.
Kien fl-2021 meta omm l-akkużat kienet irraportat lil binha għax kuljum kien qiegħed jitlobha l-flus biex skont hi jixtri “l-imbarazz”.
Hu kien akkużat li wkoll li heddidha u insulentha apparti li kellu akkużi b’pussess tad-droga eroina, iżda din l-akkużat ma ġietx ipprovata mill-Prosekuzzjoni.
L-omm fix-xhieda tagħha qalet li binha kien jitlobha l-flus u li kien ilu żmien jagħmel l-istess. Wara li ħafritlu kemm-il darba minħabba theddid, l-omm qalet li kienet iddeċidiet li ma tridx taħfirlu aktar. Qalet li tagħtu mal-€500 kull ħames ġimgħat għad-droga għax tant jippressaha li kien qisu jheddidha.
Hi kompliet tixhed li ma tridx li binha jispiċċa l-ħabs, iżda hija kienet għamlet hekk biex forsi xi darba jibda jieħu l-kura kontra l-vizzju tad-droga. Qalet li qatt ma kien vjolenti iżda kien jagħtiha ħafna torturi u kien joqgħod kwiet meta jieħu d-droga iżda jerġa’ jibda malli tispiċċalu.
Il-Prosekuzzjoni qalet li l-omm kienet bdiet tagħmel ħafna rapporti fuq binha minħabba li kien qiegħed jitlobha ħafna flus u ma setgħex tlaħħaq aktar miegħu.
Fi stqarrija li ħalla lill-pulizija, l-akkużat qal li ma jaħdimx u m’għandux relazzjoni tajba m’ommu għax kien dejjem jitlobha l-flus biex jixtri d-droga. Hu kien qal lill-pulizija li kien għamel għaxar snin ma jieħux droga, iżda meta ħassar minn mat-tfajla reġa’ waqa’ fil-vizzju.
Il-Qorti meta ġiet biex tagħti s-sentenza qieset il-fedina penali tal-akkużat li hija netta u anke x-xewqa tal-omm li kulma trid ġid lil binha. Ġie nnutat li minn wara l-każ l-akkużat għamel ħiltu kollha biex jerġa’ jaqbad it-triq it-tajba.
Il-Qorti qalet li piena ta’ ħabs mhix waħda idonja u għalhekk illiberatu bil-kundizzjoni li ma jagħmilx reat ieħor fi żmien tliet snin. Hija poġġietu taħt ordni ta’ trattament għal tliet snin.
