Bjorn Reake, Ġermaniż ta’ 30 sena kien ikkundannat tliet snin ħabs wara li nstab ħati li stupra mara Franċiża fl-appartament tiegħu f’Tas-Sliema. Il-każ seħħ f’Ottubru ta’ sentejn ilu.
Reake tressaq il-Qorti fejn kien mixli li fil-lejl ta’ bejn id-9 u l-10 ta’ Ottubru ta’ l-2021, stupra u wettaq atti sesswali fuq mara mingħajr il-kunsens tagħha.
Mill-provi illi tressqu fil-Qorti rriżulta li l-imputat u l-vittma ltaqgħu permezz ta’ dating App ‘Tinder’, u t-tnejn li huma ftehmu sabiex ikollhom x’jaqsmu sesswalment flimkien.
Fil-Qorti ntqal li dakinhar li seħħ il-każ, il-Ġermaniż u l-Franċiża ltaqgħu l-Belt u vvjaġġaw flimkien lejn Tas-Sliema. Ntqal ukoll li l-att sesswali sar fl-appartament fejn joqgħod ir-raġel.
Min-naħa tagħha l-vittma xehdet li hija kellmet lil akkużat fuq Tinder u li meta darba minnhom tkellmu fuq is-sess bejniethom, għamlu ftehim li jiltaqgħu. Fil-Qorti, il-vittma, li hija ta’ dixxendenza Franċiża, tat deskrizzjoni tal-att sesswali li l-Ġermaniż, talabha biex jagħmel.
Hija enfasizzat il-fatt li ħassitha umiljata b’dak li kien talabha biex tagħmel waqt l-att. Żedet tgħid li kien hemm atti sesswali li għamlithom minħabba l-fatt, li Reake kien sfurzaha minkejja li qaltlu li qiegħda tagħmilhom kontra r-rieda tagħha. Il-vittma għamlet rapport tlett ijiem wara li seħħ il-każ.
Min-naħa tiegħu l-akkużat, xehed li hu kien iltaqa’ mal-vittma Franċiża sabiex jagħmel att sesswali magħha u xejn iktar. Huwa ta deskrizzjoni tal-att sesswali u rrimarka li dan kollu seħħ fl-appartament tiegħu f’Tas-Sliema. Bjorn Reake iżda ċaħad l-akkużi kollha miġjuba kontrih u qal li dak kollu li sar, seħħ bil-kunsens tagħha.
Wara li semgħet ix-xiehda taż-żewġ naħat, il-Qorti preseduta mill-Maġistrat Rachel Montebello ddikjarat li ma kinitx lesta li tiġġudika lil akkużat fuq l-aspett etiku jew morali dwar id-deċiżjoni jekk sess bejn żewġ persuni li ma jafux lil xulxin kienx għaqli jew le filwaqt li saħqet li l-vittma kellha aktar kredibilità fix-xhieda tagħha.
Il-Maġistrat Montebello qalet li minn messaġġi li ntbagħtu bejn il-vittma u l-imputat jidher li r-raġel għandu karattru persistenti u li għalhekk impona fuq il-vittma sabiex tagħmel ċertu atti sesswali li hi ma riditx.
Apparti minn hekk, innutat ukoll li l-vittma riedet li l-att sesswali jsir bil-kontraċettivi u mingħajr sess anali, iżda minkejja x-xewqa tagħha, l-akkużat mar kontra r-rieda tagħha.
Għaldaqstant, il-Qorti sabet lil Ġermaniż, Bjorn Reake ħati u kkundannatu tlett snin ħabs u multa ta’ €1,000 fi ispejjeż tal-esperti li tqabbdu fil-każ. Minbarra dan, il-Qorti ħarġet ukoll ordni ta’ protezzjoni ta’ tliet snin favur il-mara Franċiża.
