Serb ta’ 43 sena ġie kkundannat tliet snin u sitt xhur ħabs wara li ammetta li wettaq serqa aggravata u vjolenti minn stabbiliment ta’ bar f’Paceville.
Victor Markovic kien tressaq il-Qorti mixli b’xejn inqas minn 14-il akkuża li rriżultaw mill-inċident vjolenti.
Huwa kien mixli b’serqa ta’ madwar €6,500 fi flus kontanti, li kkaġuna ġrieħi ħfief fuq persuna, li kkaġuna biża’ li tintuża l-vjolenza, arrest illegali, attakk u ksur tal-ordni pubblika.
Huwa ġie mixli wkoll li libes maskra f’post pubbliku mingħajr ġustifikazzjoni legali, li kien fil-pussess ta’ arma waqt it-twettiq ta’ reat, l-użu illegali ta’ vettura, kif ukoll ksur ta’ erba’ digrieti separati ta’ ħelsien mill-arrest.
Il-pulizija ġew infurmati bir-reat fis-6 ta’ Ottubru 2024. Markovic kien daħal f’bar fi Triq Santa Rita mill-bieb ta’ wara u sab ħassiel li kien waħdu. Hu talbu l-flus, iżda l-ħassiel ma kellux informazzjoni dwar il-flus tal-istabbiliment u ma setgħax jgħinu.
Markovic sussegwentement daħal f’uffiċċju u ħa €6,500 fi flus minn ġo kexxun.
Markovic ġie arrestat wara li l-pulizija il-vettura tiegħu Honda Fit f’Għawdex. Huwa inizjalment ċaħad l-akkużi meta tressaq il-Qorti fil-31 ta’ Ottubru 2024.
Madankollu, fl-14 ta’ April 2026, l-akkużat ammetta l-akkużi kollha. Il-Qorti żgurat li huwa kien konxju sew tal-konsegwenzi tal-ammissjoni tiegħu u tatu ħin biex jerġa’ jikkunsidra l-ammisjoni.
Il-partijiet qablu fuq piena ta’ tliet snin u sitt xhur ħabs.
Fid-dawl tal-ammissjoni volontarja, il-Qorti sabitu ħati tal-akkużi kollha miġjuba kontrieh. Hija kkunsidrat n-natura tar-reati, l-ammissjoni tal-akkużat u l-fedina penali nadifa tiegħu u kkonfermat is-sentenza maqbula.
Bħala konsegwenzi oħra, il-Qorti ordnat is-sospensjoni ta’ kwalunkwe liċenzja tal-armi li seta’ kellu l-akkużat u pprojbietu milli jikseb waħda għal ħames snin.
Numru ta’ depożiti tal-ħelsien mill-arrest ġew parzjalment ikkonfiskati favur il-Gvern ta’ Malta, filwaqt li ordnijiet oħra ta’ ħelsien mill-arrest ġew revokati, bil-Qorti tordna l-arrest mill-ġdid tiegħu f’ċerti każi.
L-akkużat ġie wkoll ordnat iħallas €5,911.10 f’kumpens u €10,207.39 fi spejjeż relatati mal-esperti.
Ġiet imposta wkoll ordni ta’ trażżin għal tliet snin favur il-vittma.
Il-każ instema’ quddiem il-Maġistrat Ann-Marie Thake.
L-Avukat Noel Bianco deher għall-imputat.
