Żagħżugħ ta’ 19-il sena fetaħ in-nar fl-iskola ta’ St. Louis f’Missouri l-Istati Uniti u qatel żewġ persuni u ħalla seba’ oħra feruti. L-uffiċjali tal-pulizija qalu li huma qatlu lill-aggressur fuq il-post.
Il-Kummissarju tal-Pulizija Mike Sack waqt konferenza tal-aħbarijiet qal li s’issa ma jidher li hemm l-ebda motiv għal din il-vjolenza u s-suspetti huma li l-aggressur kien qiegħed ibati minn mard mentali.
Studenti li kienu qed jaħarbu mill-iskola Central Visual and Performing Arts High School waqt il-ħin tal-attakk qalu mal-pulizija – li kienu waslu fuq il-post – li l-aggressur kien armat b’senter. Immedjatament il-pulizija daħlu f’din l-iskola u skambjaw xi tiri mal-aggressur fejn tal-aħħar intlaqat u miet fuq il-post. Is-sitwazzjoni ġiet ikkontrollata 15-il minuta wara li waslet l-ewwel talba għall-għajnuna.
L-aggressur kien identifikat bħala Orlando Harris ta’ 19-il sena li kien iggradwa minn din l-istess skola s-sena li għaddiet. Hu kellu kondotta nadifa.
